Satara News : जिल्ह्यातील पश्चिम भागात दमदार पाऊस सुरू असून जिल्ह्यात २४ तासांत सरासरी २५.०४ मिलिमीटर पावसाची नोंद झाली आहे. कोयना धरण पाणलोट क्षेत्रात मुसळधार पाऊस सुरू झाला असून धरणात ३.८३ टीएमसी वाढ झाली असून धरण २९.५४ टक्के भरले आहे.

मुसळधार पावसामुळे पाटण तालुक्यातील कोयना, केरा, उत्तर मांड, दक्षिण मांड, तारळी, मोरणा नदीच्या पाणीपातळीत वाढ झाली असून ओढे नाले भरून वाहू लागले आहेत. जिल्ह्याच्या पश्चिम भागात मंगळवारी (ता. १८) दिवसभर मध्यम स्वरूपाचा संततधार पाऊस पडत होता. रात्री पावसाचा जोर वाढला. कोयना धरण क्षेत्रात मंगळवारी दमदार पाऊस झाला.

धरण क्षेत्रातील कोयनानगर येथे १५८ मिलिमीटर, नवजाला ३०७ मिलिमीटर आणि महाबळेश्वरला २३१ मिलिमीटर पावसाची नोंद झाली आहे. सध्या जलाशयात प्रति सेकंद ४४ हजार ३०५ क्युसेक पाण्याची आवक होत आहे. धरणात २४ तासांत ३.८३ टीएमसी वाढ झाली असून धरणात एकूण ३१.१० टीएमसी म्हणजेच २९.५४ टक्के भरले आहे.

धोम, कण्हेर, उरमोडी, तारळी या प्रमुख धरणांच्या पाणलोट क्षेत्रात पावसाचा जोर असल्याने याही प्रमुख धरणातही पाण्याची आवकेत वाढ होत आहे. जिल्ह्याच्या पश्चिमेकडील महाबळेश्वर, जावळी, पाटण सातारा या तालुक्यांत अनेक ठिकाणी दमदार पाऊस सुरू झाला आहे.

कऱ्हाड, वाई, कोरेगाव या तालुक्यांत मध्यम, तर माण, खटाव, फलटण, खंडाळा तालुक्यांत हलक्या स्वरूपाचा पाऊस झाला आहे. गेले दीड महिन्यापासून प्रतीक्षेत असलेल्या शेतकऱ्यांना या पावसाचा काही प्रमाणात दिलासा मिळणार आहे. पेरणी झालेल्या पिकांना या पावसामुळे जीवनदान मिळण्याबरोबर शिल्लक पेरण्या करण्यास पोषक वातावरण होत आहे.