Nagar News : अहमदनगर जिल्ह्यातील नेवासा येथील लोकनेते मारुतराव घुले-पाटील ज्ञानेश्वर सहकारी साखर कारखान्याकडून कपात करण्यात आलेली रक्कम शेतकऱ्यांना परत मिळणार आहे. साखर आयुक्त शेखर गायकवाड यांनी याबाबतचे आदेश दिले आहेत.

२०२१-२२ या गाळप हंगामात कारखान्याने शेतकऱ्यांच्या बिलातून प्रतिटन १०९.६५ पैसे रकमेची कपात केली होती. परंतु साखर आयुक्तांच्या आदेशामुळे शेतकऱ्यांना ही रक्कम परत मिळण्याचा मार्ग मोकळा झाला आहे.

शेतकऱ्यांकडून कपात केलेली रक्कम कारखाना व्यवस्थापनाने ठेवीमध्ये रुपांतरीत केली होती. कारखान्याच्या या भूमिकेविरोधात भाजपचे माजी आमदार बाळासाहेब मुरकुटे यांच्या नेतृत्त्वामध्ये ऐन दिवाळी सणादिवशी नेवासा तहसिल कार्यालयासमोर चटणी भाकरी आंदोलन करण्यात आले होते.

दरम्यान, या प्रकरणी राज्याचे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी विशेष लक्ष घातले होते. त्यानुसार ज्या शेतकऱ्यांना कारखान्याने केलेली कपात मान्य नाही, असे शेतकरी कपात केलेली रक्कम परत मिळविण्यासाठी कारखान्याकडे अर्ज करून पैसे परत मिळवू शकतात, अशा प्रकारचे आदेश साखर आयुक्तांनी काढले आहे. त्यामुळे शेतकऱ्यांना दिलासा मिळाला आहे.