Ratnagiri News : खाडीपट्ट्यातील करंबवणे खाडीलगत असलेल्या भिले-जांभूळवाडी खार भूमी विकास योजनेच्या उघाडीची झडपे गेल्या महिनाभरापूर्वी निसटल्याने गेल्या दहा दिवसांपासून या परिसरातील बहुतांश शेती पाण्याखाली गेली आहे. अखेर दहा दिवसांनी या नुकसानग्रस्त शेतीची पाहणी कृषी अधिकाऱ्यांनी केली. येथील शेतीचे पंचनामे सुरू झाले आहेत.

समुद्राच्या भरतीचे खारे पाणी शेतात घुसून होणारे नुकसान टाळण्यासाठी खाडीकिनारी सरंक्षक बंधारे बांधून संबंधित क्षेत्र लागवडीलायक करण्याच्यादृष्टीने खारभूमी विकास योजना राबवली जात आहे. या योजनेतील भिले गावच्या खाजण जमिनीच्या लगत असलेल्या करंबवणे खाडीला वळसा घालणारा दोन किमी लांबीचा मातीचा बंधारा बांधण्यात आला आहे.

यातून पाणी जाण्यासाठी बांधण्यात आलेल्या उघाडीची झडपे जोरदार पावसाच्या पाण्यात महिनाभरापूर्वा निसटली. झडपे निसटल्याने भरतीचे पाणी आतमध्ये घुसत आहे. दहा दिवस उलटून गेले तरीही शेतातील पाणी निघालेले नाही. नव्याने केलेली भात लावणी पाण्याखाली असल्याने मोठे नुकसान झाले आहे.

यासंदर्भात गुरुवारी (ता. २७) तहसीलदार प्रवीण लोकरे यांनी दिलेल्या सूचनेनुसार उपविभागीय कृषी अधिकारी राजेंद्र माने, तालुका कृषी अधिकारी शत्रुघ्न मेहेत्रे, मंडल कृषी अधिकारी राहुल आडके, डी. के. काळे, कृषी सहायक सोनाली नलावडे यांनी घटनास्थळी जाऊन नुकसानग्रस्त शेती पाहणी केली.

सरपंच आदिती गुडेकर यांच्याशी चर्चा केली. नुकसानग्रस्त शेतीचे पंचनामे शुक्रवारपासून (ता. २८) सुरू झाले आहेत. विशेष म्हणजे चार महिन्यांपूर्वा निविदा काढून नवीन झडपे बसवण्यात आली होती. यासंदर्भात येथील खारभूमी कार्यालयात तक्रार झाल्यानंतरही महिनाभरात साधी पाहणी झाली नाही. कंत्राटदाराला सांगण्यात आल्याचे अधिकाऱ्यांनी सांगितले.