Pomegranate Crop Damage : गुजरातमध्ये अतिवृष्टीचा मृग बहरातील डाळिंबाला फटका

Sangli News : गुजरातमध्ये सुरू असलेल्या अतिवृष्टीचा फटका डाळिंब पिकाला बसला आहे. परिणामी, फुलोरावस्थेत असलेल्या बागांमध्ये फुलगळ, करपा आणि तेलकट रोगाचा प्रादुर्भाव झाला आहे. यामुळे राज्यातील मृग बहरातील डाळिंबाचे सुमारे ६० टक्के नुकसान झाल्याचा अंदाज डाळिंब संघाने व्यक्त केला.

गुजरातमध्ये डाळिंबाचे अंदाजे २० हेक्टर डाळिंबाचे क्षेत्र आहे. गतवर्षी गुजरातमध्ये पावसाचे प्रमाण कमी होते. त्यामुळे गेल्यावर्षी राज्यात सुमारे १० ते १२ हेक्टरवर मृग बहर धरला होता. पोषक वातावरण आणि कमी पाऊस यामुळे डाळिंबाचे फारसे नुकसान झाले नव्हते.

दरही चांगले मिळाले होते. त्यामुळे राज्यात डाळिंबाच्या क्षेत्रात वाढ होत असल्याचे चित्र आहे. वास्तविक पाहता, गुजरातमध्ये मृग आणि अंबिया हे दोन बहर प्रामुख्याने घेतले जातात. राज्यासह महाराष्ट्रात डाळिंब विक्रीला येतात.

गुजरातमध्ये यंदाच्या मृग बहर हंगामात १२ ते १३ हजार हेक्टरवर बहर धरला आहे. सध्या डाळिंब बागा फुलोरावस्थेत आहेत, तर काही ठिकाणी लिंबाच्या आकाराची फळे लागली आहेत. पोषक वातावरण असल्याने येथील शेतकऱ्यांनी बागा चांगल्या साधल्या होत्या. मात्र, गेल्या काही दिवासांपासून अतिवृष्टी सुरू आहे.

सतत पाऊस सुरू असल्याने बागामध्ये पाणी साचले आहे. परिमाणी फुलोरावस्थेत असलेल्या बागांमध्ये फूलकळी गळ होण्यास प्रारंभ झाला आहे. त्यातच करपा आणि तेलकट रोगाचा प्रादुर्भाव होऊ लागला आहे. यामुळे राज्यात सुमारे ६० टक्के बागांचे पावसामुळे नुकसान झाले आहे. अतिवृष्टी आणि रोगाच्या प्रादुर्भावामुळे डाळिंब उत्पादक शेतकरी मेटाकुटीला आले आहेत.

पीन होल बोअरचा प्रादुर्भाव

गुजरामध्ये पीन होल बोअरचा फारसा प्रादुर्भाव झाला नाही. त्यामुळे या प्रादुर्भावापासून बागा वाचल्या होत्या. मात्र, यंदापासून डाळिंबामध्ये ‘पीन होल बोअर’चा प्रादुर्भाव होण्यास सुरुवात झाली असल्याने डाळिंबाच्या बागा धोक्यात आल्या आहेत. त्यामुळे डाळिंब उत्पादक शेतकऱ्यांवर नवे संकट आल्याने शेतकऱ्यांच्या अडचणीत वाढ झाली आहे.