Wheat Harvesting: गव्हाच्या मळणीला वेग: हार्वेस्टर यंत्रे दाखल!

Pune News: रब्बी हंगामातील गव्हाची पिके काढणीच्या अवस्थेत आली आहेत. पुणे विभागातील अनेक तालुक्यात शेतकरी गहू काढणीच्या कामात व्यस्त असून त्यांना मजुरांची समस्या भासत आहे. त्यामुळे वाढीव मजुरी देऊन गव्हाची काढणी शेतकरी करत आहे. काही ठिकाणी काढणी केलेल्या गव्हाची मशीनच्या साहाय्याने मळणी व काढणीची कामे सुरू झाले असून प्रति एकर चार ते साडेचार हजार रुपये दर आकारला जात आहे.

रब्बी हंगामात गव्हाच्या पेरणीस उशिराने पोषक हवामान तयार झाल्याने गहू पिकाला पसंती दिली आहे. पुणे विभागातील अनेक शेतकरी गहू पिकाकडे वळाले. सध्या पिके काढणीच्या अवस्थेत असून अनेक ठिकाणी काढणीला चांगलाच वेग आला आहे.

विभागात सरासरी एक लाख ६८ हजार ७९६ हेक्टरपैकी एक लाख ६२ हजार ८९९ म्हणजेच ९७ टक्के पेरणी झाली असून पिके जोमात आली आहेत. त्यातच गव्हाच्या पेरणीस नोव्हेंबर ते डिसेंबर हा कालावधी चांगल्या असतो. मात्र दिवाळीनंतर अवकाळी झालेल्या पावसामुळे पोषक वातावरण तयार न झाल्याने अनेक शेतकऱ्यांनी उशिराने पेरण्या केल्या होत्या.

सध्या गव्हाचे पीक पक्व झालेले आहे. हार्वेस्टरने गहू तयार करण्यास एकरी चार ते साडे चार हजार रुपये घेतात. मजुरांकडून गहू सोंगणी, पेंढ्या बांधणे, गहू मळणी यंत्राने तयार करून देण्यासाठी एकरी दोन पोते गहू घेतात. मळणी यंत्राचा खर्च शेतकऱ्यांना द्यावा लागतो. महिला मजूर २५० ते ३०० रुपये, तर पुरुषांना ४०० रुपये रोजंदारी चालू आहे. गहू तयार करताना गव्हाचे भुस पाहिजे असल्यास असे हार्वेस्टर एकरी सहा हजार रुपये घेतात. शेतकऱ्यांना भुस नको असेल तर इतर शेतकरी भूस घेऊन जातात व हार्वेस्टरचा खर्चही ते देतात. या भुसाचा वापर जनावरांना चारा म्हणून होतो. एकरी सरासरी उत्पादन १५ ते १८ पोते मिळत असल्याचे शेतकरी सांगतात.

पुणे जिल्ह्यात गहू पिकाची मळणी करून घेण्यासाठी शेतकऱ्यांनी लगबग सुरू केली आहे. दरवर्षी या परिसरात फेब्रुवारी महिन्यात पंजाब, हरियाना या परराज्यांतील हॉर्वेस्टर यंत्रे गव्हाच्या मळणीसाठी दाखल होत असतात. हॉर्वेस्टर यंत्रांमुळे कमी वेळात, कमी कष्टात गव्हाची मळणी होते. तसेच मजुरांची टंचाई त्यामुळे हॉर्वेस्टर यंत्राद्वारे गहू मळणीला शेतकऱ्यांची पसंती असल्याचे दिसून येते. गव्हाच्या मळणीसाठी हॉर्वेस्टरवाले एकरी साडे चार हजार रुपयांपर्यंत दर घेत आहेत.