Sarpanch Murder Case: मस्साजोगचे ग्रामस्थ बसले अन्नत्याग उपोषणाला; ग्रामस्थांची आरोपी कृष्णा आंधळेच्या अटकेची मागणी

Beed News: बीड जिल्ह्यातील मस्साजोगचे सरपंच संतोष देशमुख यांच्या हत्याप्रकरणी मस्साजोगच्या ग्रामस्थांनी मंगळवारपासून (ता.२५) अन्नत्याग उपोषणाला सुरुवात केली आहे. सरपंच संतोष देशमुख यांच्या हत्येला ७७ दिवस उलटून गेले. परंतु अद्यापही या प्रकरणातील आरोपी कृष्णा आंधळे फरार आहे. त्यामुळे सरपंच देशमुख यांच्या हत्येतील आरोपींना अटक करावी. तसेच आरोपींना शिक्षा देऊन देशमुख कुटुंबाला न्याय द्यावा, या मागणीसाठी मस्साजोगचे ग्रामस्थ आक्रमक झाले आहेत. सकाळी १० वाजता ग्रामस्थांनी उपोषण सुरू केले आहे.

अन्नत्याग उपोषणाच्या आधी पोलिस अधीक्षकांसोबत झालेल्या चर्चेत काही अनपेक्षित बाबी उघड झाल्या आहेत, असं धनंजय देशमुख यांनी सांगितलं आहे. देशमुख म्हणाले, "पोलीस आरोपींना अभय देत आहेत. पोलीस एसपीच्या कानावर तपास काय झाला, ते घालत नाहीत. तसेच पोलिसांनी केलेला तपास असमानधारक आहे." असंही धनंजय देशमुख म्हणाले. 

संतोष देशमुख यांच्या हत्येच्या तपासाबद्दल पोलिसांच्या कार्यशैलीवर संशय व्यक्त केला जात आहे. देशमुख कुटुंबाने देखील पोलिस कात तपास करत आहेत, याबद्दलची माहिती देत नसल्याचा आरोप केला होता. तसेच पोलिसांनी आरोपींना मदत केल्याचा गंभीर आरोप करण्यात आला होता. अद्यपाही पोलिस निरीक्षकांसोबत केलेली चर्चा असमाधानकार असल्याचं धनंजय देशमुख म्हणाले.

ग्रामस्थांच्या मागण्या काय? 

- फरार आरोपी कृष्णा आंधळे याला अटक झाली पाहिजे. 

- कृष्णा आंधळेचे समर्थक स्टेटस ठेवत आहेत. त्याच्या कृतीचं समर्थन करत आहेत. तसेच प्राणघातक हल्ला करत आहेत. त्यामुळे समर्थकांना अटक झाली पाहिजे.

- सरकारी वकिलांची नियुक्ती करावी.

- प्रकरण फास्टट्रक न्यायालयात अंडरट्रायल चालवावं. 

वरील प्रमुख मागण्या मस्साजोग ग्रामस्थ करत आहेत.

दरम्यान, संतोष देशमुख यांच्या हत्येनंतर वेळोवेळी मस्साजोग ग्रामस्थांनी उपोषण, आंदोलन केली आहेत. देशमुख यांच्या हत्याप्रकरणी पहिल्या दिवशीच गुन्हा दाखल करण्यासाठी ग्रामस्थ रस्त्यावर उतरले होते. गुन्हा दाखल केल्यानंतर वाल्मिक कराडच्या अटकेसाठी रस्त्यावर उतरले होते. तसेच कराडवर मक्कोका लावण्यात यावा या मागणीसाठी ग्रामस्थ आक्रमक झाले होते. आता धनंजय देशमुख यांच्यासोबत अन्नत्याग उपोषणाला ग्रामस्थ बसले आहेत.