Cotton Seed Scam: बोगस बियाणे विक्रीवर कडक कारवाई

Mumbai News: कापसाच्या बोगस बियाणे विक्री रॅकेटमध्ये सहभागी असलेल्या राज्यासह परराज्यांतील गुन्हेगारांवर कडक कारवाई करून गुन्हा दाखल करण्यात येईल, अशी ग्वाही राज्याचे कृषिमंत्री माणिकराव कोकाटे यांनी शुक्रवारी (ता. १८) दिली.

राज्यात बोगस बियाण्यांमुळे शेतकऱ्यांची मोठी फसवणूक राजरोस सुरू आहे. त्यामुळे मोठा आर्थिक फटका बसत आहे. या संदर्भात विधानसभेत राष्ट्रवादी कॉंग्रेसचे आमदार काशिनाथ दाते यांनी प्रश्नोत्तराच्या तासात प्रश्न उपस्थित केला. तसेच परराज्यातून बियाणे येत असल्याचे कृषिमंत्र्यांनी सांगितले असून त्यावर कारवाई करण्यात येणार का? असा थेट सवाल केला. या चर्चेत कॉंग्रेसचे आमदार विजय वडेट्टीवार यांनी सहभाग घेत बोगस बियाणे कंपन्यांवर कारवाई करण्यासाठी कडक कायदा करण्याची मागणी केली.

या प्रश्‍नाला उत्तर देताना कृषिमंत्री कोकाटे म्हणाले, ‘‘बोगस बियाणे विक्री करणाऱ्यांवर कडक कारवाई करून त्यांना काळ्या यादीत टाकण्यात येईल. महिको कंपनीच्या ७३५१ कापूस बियाणे वाणाच्या विक्रीमध्ये पाचेगाव (अहिल्यानगर) येथे गैरव्यवहार झाला. त्या संदर्भात त्रिमूर्ती अॅग्रो सर्व्हीसेस पाचेगाव या बियाणे विक्रेत्यावर गुन्हा दाखल करून परवाना कायमस्वरूपी रद्द करण्यात आला आहे. परराज्यातून बोगस बियाणे राज्यात आणून विक्री करणाऱ्या गुन्हेगारांवर कडक कारवाई करण्यात येईल,’’

महाराष्ट्रात कापूस प्रमुख पीक आहे. त्यामुळे कापूस बियाण्यांची मागणी मोठ्या प्रमाणावर असते. त्याचा फायदा घेत परराज्यातील बियाणे उत्पादक कंपन्या महाराष्ट्रात बोगस बियाण्यांची विक्री करतात. त्यासाठी अव्वाच्या सव्वा पैसे उकळले जातात. त्यामुळे शेतकऱ्यांवर दुबार पेरणीची वेळ येते.

‘...अन्यथा नवीन कायदा करणार’

बोगस बियाणे विक्री करणाऱ्यांना काळ्या कोठडीत टाकण्यासाठी राज्य सरकारने डिसेंबर महिन्यात नवीन कायदा आणावा, अशी मागणी वडेट्टीवार यांनी केली. त्यावर कृषिमंत्री कोकाटे यांनी बोगस बियाण्यांसंदर्भात केंद्र सरकार कडक कायदा करण्याच्या विचारात असून केंद्रीय कृषिमंत्र्यांनी त्याबद्दल घोषणा केली आहे. जर केंद्र सरकारचा कायदा आला तर त्याचा राज्य सरकार स्वीकार करेल किंवा गरज पडली तर नवीन कायदा करेल, असे त्यांनी जाहीर केले.