Pune News: शेतकऱ्यांसाठी गावपातळीवर राबविल्या जाणाऱ्या २८ प्रकारच्या उपक्रमांची नोंद डिजिटल रूपात आणणाऱ्या ‘महाकृषी’ उपाययोजनांचा श्रीगणेशा कृषी सचिव व आयुक्तांनी यांनी केला आहे. विशेष म्हणजे दोघांनी स्वतः गावशिवारात जात तेथे केलेल्या कामांचे अहवाल या अॅपमध्ये नोंदविले आहेत.
राज्यात सध्या क्षेत्रिय कर्मचाऱ्यांचे बेमुदत कामबंद आंदोलन चालू आहे. मात्र कृषी खात्याचे प्रधान सचिव विकासचंद्र रस्तोगी व कृषी आयुक्त सूरज मांढरे हे दोघे गावशिवारात फिरत असून खरिपाची तयारी जाणून घेत आहेत. क्षेत्रीय पातळीवर शेतकऱ्यांसाठी २८ प्रकारचे उपक्रम राबविले जातात. वर्षानुवर्षे या उपक्रमांचे नियोजन व अहवाल सादर करण्याची कामे क्षेत्रीय कर्मचाऱ्यांना कागदोपत्री करावी लागत होती.
मात्र चालू खरिपापासून कागदोपत्री कामकाज बंद करण्यात आले असून त्याची जागा सर्व ‘महाकृषी- खरीप मोहीम’ या उपाययोजनांनी (अॅप) घेतली आहे. त्यासाठी विस्तार व प्रशिक्षण संचालक रफिक नाईकवाडी यांनी महाआयटीच्या चमूची मदत घेतली आहे. डिजिटल कामकाजाची पद्धत सचिव व आयुक्तांनी शेतात जात समजावून घेतली व या उपक्रमाचे मनापासून कौतुक केले.
तोंडी विचारणा,अहवाल पद्धत बंद
खरीप नियोजनातील सर्व कामकाज आता अॅपवर चालू झाले आहे. योजनानिहाय आराखडे, उद्दिष्टे, साध्य तसेच शेतकऱ्यांच्या छायाचित्रांसह क्षेत्रीय पातळीवरील सर्व माहिती या अॅपमधून पाठवता येत असल्यामुळे कामाचा अहवाल (रिपोर्टिंग) सादर करण्याची पद्धत अतिशय सुटसुटीत व सोपी झाली आहे. कृषी सचिव व आयुक्तांनी स्वतः शेतकऱ्यांसोबत कार्यक्रम घेतल्यानंतर या उपक्रमांची माहिती अॅपमध्ये भरली आहे.
‘‘आता क्षेत्रीय पातळीवरील कामाची माहिती कोणीही अहवालाद्वारे किंवा तोंडी विचारणार नाही. क्षेत्रीय पातळीवरील कर्मचाऱ्यांनी केलेल्या कामाची माहिती व छायाचित्रे यापुढे वरिष्ठांना या अॅपमध्येच मिळतील. त्यामुळे कष्टाळू कर्मचाऱ्यांच्या कामाची बिनचूक नोंद होईल. तसेच, या अॅपमुळे कामचुकारांची कोंडी होणार आहे,’’ अशी माहिती क्षेत्रीय पातळीवरील एका अधिकाऱ्याने दिली.
कामाची नोंदणी बंधनकारक
क्षेत्रीय कामकाजासाठी जात असल्याचे सांगत कृषी विभागाचे अधिकारी व कर्मचारी गावाशिवारात जातात. परंतु ते नेमके काय करतात. शेतकऱ्यांना भेटतात की नाही, भेटत असल्यास कामाचे स्वरूप कसे असते याविषयी वरिष्ठांना काहीही माहीत नसते. ‘महाकृषी’ अॅपमुळे अधिकारी व कर्मचाऱ्यांना कामाची नोंदणी करणे एकप्रकारे बंधनकारक झाले आहे.
कर्मचारी संबंधित गावात गेला की नाही याची खात्री होण्यासाठी या अॅपमध्ये अक्षांश रेखांश असलेले अर्थात जिओ टॅगिंग केलेले छायाचित्र अपलोड करावे लागणार आहे. तूर्त ही सुविधा पहिल्या टप्प्यात चालू करण्यात आलेली नाही. मात्र भविष्यात ही सुविधा उपलब्ध करून दिली जाईल, असे सूत्रांचे म्हणणे आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.