Operation Dronagiri: देशातील पाच जिल्ह्यांमध्ये ‘ऑपरेशन द्रोणागिरी’ची अंमलबजावणी सुरू

Washim News: देशातील पाच जिल्ह्यांत ‘ऑपरेशन द्रोणागिरी’ हा महत्त्वाकांक्षी उपक्रम राबवला जात असून यामध्ये विशेष जिल्ह्यांपैकी एक म्हणून वाशीमचा समावेश करण्यात आला आहे. ‘ऑपरेशन द्रोणागिरी’ हा केवळ नावीन्यपूर्ण उपक्रम नसून तो जिल्ह्याला प्रगत तंत्रज्ञानाच्या मदतीने एक नवी ओळख निर्माण करून देणारा उपक्रम ठरणार आहे.

ऑपरेशन द्रोणागिरी या महत्त्वाकांक्षी उपक्रमात महाराष्ट्रातील वाशीम हा एकमेव जिल्हा निवडण्यात आला आहे. विज्ञान आणि तंत्रज्ञान विभागाने (DST) डिसेंबर २०२२ मध्ये सुरू केलेल्या या राष्ट्रीय जिओस्पेशियल धोरणाअंतर्गत (NGP) भारताला जिओस्पेशियल तंत्रज्ञानात जागतिक नेता बनवण्याचे उद्दिष्ट ठेवण्यात आले आहे.

ऑपरेशन द्रोणागिरी ?

ऑपरेशन द्रोणागिरी ही NGP च्या अंमलबजावणीतील पहिला टप्पा आहे. नोव्हेंबर २०२४ ते जून २०२५ दरम्यान देशातील पाच राज्यांतील सहा जिल्ह्यांमध्ये राबवण्यात येणार आहे. या जिल्ह्यांमध्ये महाराष्ट्रातील वाशीम, उत्तर प्रदेशातील वाराणसी, हरियानातील सोनीपत आणि गुरुग्राम, आसाममधील कामरूप आणि आंध्र प्रदेशातील विजयनगरचा समावेश आहे. प्रत्येक जिल्ह्याला विशिष्ट क्षेत्रांशी संबंधित आव्हानांसाठी पायलट प्रकल्प म्हणून निवडण्यात आले असून वाशीम जिल्हा कृषी क्षेत्रात जिओस्पेशियल तंत्रज्ञानाचा उपयोग करण्यासाठी पायलट म्हणून निवडला आहे.