Nagpur Heavy Rain: नागपुरात अतिवृष्टीमुळे ७,४३० हेक्टरवर नुकसान

Nagpur News: नागपूर जिल्ह्यात ७ ते ९ जुलैदरम्यान सलग ६० तास झालेल्या मुसळधार पावसाने पूरस्थिती निर्माण होऊन शेती, घर आणि जनावरांचे मोठ्या प्रमाणात नुकसान झाले. जिल्हा प्रशासनाच्या अंतिम अहवालानुसार, ३६१ गावांतील ९,८४१ शेतकऱ्यांच्या ७,४३० हेक्टरवरील खरीप पिकांचे नुकसान झाले आहे.

यामुळे शेतकऱ्यांमध्ये चिंता पसरली असून, त्यांना शासनाकडून मदतीची अपेक्षा आहे. यंदा मॉन्सूनने वेळेत हजेरी लावल्याने शेतकऱ्यांनी खरीप पिकांच्या पेरणीला वेग दिला होता. मात्र अचानक पावसाने दडी मारल्याने काही ठिकाणी दुबार पेरणी करावी लागली, तर काही ठिकाणी पेरणीला उशीर झाला. ६ जुलैच्या मध्यरात्रीपासून सुरू झालेल्या संततधार पावसाने ८ आणि ९ जुलैला हाहाकार माजवला.

दोन दिवसांत २०० मिमीपेक्षा जास्त पावसाची नोंद झाली, ज्यामुळे शेतीसह जनजीवन विस्कळीत झाले. जिल्हा प्रशासनाच्या अहवालानुसार, कुही, उमरेड, नागपूर (ग्रामीण), सावनेर, कामठी, पारशिवनी, मौदा आणि भिवापूर तालुक्यांतील ३६१ गावांतील ९,८४१ शेतकऱ्यांचे ७,४३० हेक्टरवरील पिकांचे नुकसान झाले. यामध्ये कापूस, सोयाबीन, धान, मिरची, केळी, तूर आणि भाजीपाला पिकांचा समावेश आहे.

सर्वाधिक नुकसान कुही तालुक्यात झाले, तिथे ५,५९४ शेतकऱ्यांच्या ४,६७५ हेक्टरवरील पिके उद्ध्वस्त झाली. यामुळे शेतकऱ्यांवर संकट कोसळले आहे. पूरस्थितीमुळे नदी-नाल्यात वाहून तीन व्यक्तींचा मृत्यू झाला, तर २२ पशुधन दगावले. ५४२ घरांचे नुकसान झाले, तर २२५ गोठ्यांचे नुकसान झाले. पाणी घरात शिरल्याने ९२४ नागरिकांच्या साहित्याचे नुकसान झाले. 

ई-पंचनाम्यामुळे विलंब! 

अतिवृष्टीमुळे नुकसान झाल्यानंतर जिल्हाधिकाऱ्यांनी तातडीने पंचनामे करण्याचे निर्देश दिले होते. मात्र ई-पीक पंचनाम्याची यंत्रणा बंद पडल्याने पंचनाम्यांना विलंब झाल्याचे सांगण्यात येते. आता महसूल विभागाने पंचनामे पूर्ण केले असून, अंतिम अहवाल तयार झाला आहे. सदर अहवाल विभागीय आयुक्तांकडे सादर करून त्यांच्या माध्यमातून तो शासनाकडे पाठविण्यात येणार आहे.