Mohini Mohan Mishra: ‘जीएम’ऐवजी जैविक पिके लागवडीला प्रोत्साहन द्या: मोहिनी मोहन मिश्र

Nagpur News: पंजाब कृषी विद्यापीठातील प्रक्षेत्रावर जीएम मक्याच्या चाचणीला परवानगी देण्यात आली आहे. हा प्रकार देशातील कोट्यवधी नागरिकांच्या आरोग्याशी खेळण्यासारखा असल्याने ही चाचणी तत्काळ रद्द करावी, अशी मागणी भारतीय किसान संघाचे महामंत्री मोहिनी मोहन मिश्र यांनी विद्यापीठाच्या कुलगुरूंकडे केली आहे.

भारतीय किसान संघाने पंजाब विद्यापीठाला या संदर्भाने पत्र लिहून या विषयावर गंभीर चिंता व्यक्‍त केली आहे. पत्रानुसार, जीएम मका आरोग्यासाठी सुरक्षित असल्याचा दावा केला जातो. मग त्याच्या चाचण्या नियंत्रित परीक्षणाखाली का होत आहेत? जर मानवी आरोग्यासाठी असुरक्षित आहे तर मग त्याला आतापर्यंत प्रतिबंधित का करण्यात आले नाही? ‘जीएम’ मक्‍याचा सर्वांत मोठा उत्पादक देश अमेरिका आहे.

उत्पादित ८० टक्‍के मक्‍याचा उपयोग अमेरिकेत पशुखाद्य म्हणून होतो, तर उर्वरित २० टक्‍के मका इथेनॉल आणि प्लॅस्टिक तयार करण्याकामी वापरला जातो. भारतात मात्र याउलट स्थिती आहे. मानवी खाद्य म्हणून मोठ्या प्रमाणावर मक्‍याचा वापर होतो. अत्यंत कमी वापर इथेनॉल क्षेत्रात आहे. त्यामुळेच जीएम मका आल्यास शेतीपासून ते खरेदीदार, प्रक्रिया आणि बाजार तसेच खाद्यान्न अशा विविध टप्प्यांवर त्याची भेसळ होण्याची शक्‍यता आहे, असे पत्रात म्हटले आहे.

कापसातील दावे फेल

‘जीएम’ मका हा कीड-रोग तसेच तणाला प्रतिकारक असल्याचा अपप्रचार केला जात आहे. असाच प्रचार करून २००२ मध्ये बीजी-१ हे तंत्रज्ञान कापसात आणले गेले. २००५ पर्यंत त्याला किडींनी फस्त केले. त्यानंतर कीड-रोगाला अधिक प्रतिकारक असल्याचा खोटा दावा करीत २००६ मध्ये बीजी-२ तंत्रज्ञान आणले.

त्यावर २००९ मध्ये कीड-रोग वाढले त्याबरोबरच पांढरी माशी आणि रसशोषक किडींनी कापसाचे पीक खाऊन टाकले. अशाप्रकारे जीएम कापूस पीक असुरक्षित आणि प्रभावहीन निघाले. हा अनुभव पाहता ‘जीएम’ मकादेखील अयशस्वी ठरणार अशी स्थिती आहे. यातून शेतकऱ्यांचेच नुकसान होण्याची शक्‍यता असल्याने चाचण्यांना परवानगी देऊ नये, असे भारतीय किसान संघाचे म्हणणे आहे.