Agri Hackathon 2025: ‘हॅकेथॉन’मध्ये जाणून घ्या शेतीचे नवीन तंत्रज्ञान

Pune News: शेती करताना शेतकऱ्यांना विविध समस्यांना तोंड द्यावे लागत आहे. त्यावर मात करण्यासाठी व आपल्या प्रश्नाची सोडवणूक करून घेण्यासाठी हॅकेथॉनचा सिंचननगर येथे रविवारी (ता. १) प्रारंभ झाला असून मंगळवारपर्यंत (ता. ३) सुरू राहणार आहे.

येथे शेतकऱ्यांना शेतीसंबधी नवनवीन तंत्रज्ञान पाहण्याची संधी मिळत असल्याने शेतकरी भेटी देऊन विविध माहिती जाणून घेत आहेत.हॅकेथॉनमध्ये शेतातील पिकांच्या लागवडीच्या यंत्रांच्या मशिनपासून ते विक्री तंत्रज्ञानपर्यंतची सर्व माहिती उपलब्ध करून देण्यात आली आहे.

प्रामुख्याने शेतकऱ्यांना शेतात रोपांच्या लागवडीचे यंत्र, कापूस वेचणी, रोव्हर इलेक्ट्रीक स्प्रेअर मशिन, आंबा काढणी यंत्र, युरिया ब्रिकेट टाकण्याचे मशिन, माती परीक्षणाचे विविध सॉप्टवेअर, मोबाइल ॲप्लिकेशन, रोबोटिक फवारणी यंत्र, शेतीच्या सुरक्षिततेसाठी आवश्यक असलेले कॅमेरे, पिकांची स्थिती सांगणारे ॲप,

पिकांचावाढीनुसार आवश्यक असलेला डेटा, शेतीमालाची विक्री व्यवस्था, ठिंबक सिंचन, ऊस लागवडीचे यंत्र, अन्नधान्याचे नुकसान होऊ नये यासाठी असलेले विविध औषधे, नारळाच्या पानापासून बनविलेल्या विविध वस्तू, बाजरीची उत्पादने, सोलर ड्रायर, हळद प्रोसेसिंग, मधमाशीपालनाचे ऑटोमॅटिक यंत्र,

बियाणांची उगवण क्षमता वाढवणारे यंत्र, मिलेट जाम, शेतातील काडीकचऱ्यापासून बनविलेली इकोफ्रेंन्डली वीट, तसेच शेतरस्ते व शेतीच्या विविध समस्या सांगणारे ॲप, शेतीकामांसाठी मजूर उपलब्ध करून देणारे ॲप येथे पाहण्यासाठी उपलब्ध आहेत.