Bhujal Award : ‘भूजल’ ग्रामस्पर्धेतील ग्रामपंचायतींचा सन्मान

Pune News : अटल भूजल योजनेच्या भूजल समृद्ध ग्रामस्पर्धेतील विजेत्या ग्रामपंचायतींना उपमुख्यमंत्री अजित पवार यांच्या हस्ते पारितोषिके वितरित करण्यात आली. यावेळी काऱ्हाटी ग्रामपंचायतीला पहिले ५० लाखांचे, सोनोरीला दुसरे ३० लाखांचे तर चांबळीला तिसरे २० लाख रुपयांचे बक्षीस मिळाले.

भूजलाच्या अनियंत्रित उपशामुळे भूजल पातळीत होणारी घसरण थांबविण्याकरिता केंद्र शासन व जागतिक बँक अर्थसह्यित अटल भूजल योजना २६ नोव्हेंबर २०२० पासून राबविण्यात येत आहे.

त्याअंतर्गत ‘भूजल समृद्ध ग्रामस्पर्धा २०२२-२३’ चे निकाल नुकतेच जाहीर झाले होते. त्यात जिल्हास्तरावर बारामती तालुक्यातील काऱ्हाटी या गावाने प्रथम, पुरंदर तालुक्यातील सोनोरी आणि चांबळी या गावाने अनुक्रमे द्वितीय आणि तृतीय क्रमांक पटकाविला.

लोकसहभागातून भूजल व्यवस्थापन करणे हा या योजनेचा गाभा आहे. त्याकरिता ग्रामस्तरावर जल अंदाजपत्रक तयार करणे, भूजल उपलब्धतेतील तूट भरून काढणे हे उद्दिष्ट आहे.

त्यानुसार जिल्ह्यातील पुरंदर तालुक्यातील २२ ग्रामपंचायती, बारामतीतील आठ ग्रामपंचायतींनी स्पर्धेमध्ये सहभाग घेतला होता. त्यांची एकूण ५५० गुणांसाठी स्पर्धा घेण्यात आली. स्पर्धेचे मूल्यांकन उपविभागस्तर, जिल्हास्तर व राज्यस्तरावर करण्यात आले. त्यानुसार या स्पर्धेचा निकाल जाहीर करण्यात आला.