Mahamudra Book: ‘महामुद्रा’तील इतिहास भविष्यातील पिढीसाठी उपयुक्त : नितीन गडकरी

New Delhi News: ‘‘महामुद्रा पुस्तकात केंद्रातील ज्या मराठी मंत्र्यांविषयी लिहिले आहे त्या प्रत्येकाचे मोठे योगदान आहे. धनंजय बिजले यांनी पुस्तकात मांडलेला हा इतिहास भविष्यातील  पिढीसाठी खूप उपयोगाचा ठरेल. महामुद्राच्या निमित्ताने सर्व नेत्यांचे कार्यकर्तृत्व भविष्यातील  पिढीला नक्कीच  प्रेरणा देत राहील,’’ अशी भावना केंद्रीय रस्ते वाहतूक आणि महामार्ग मंत्री नितीन गडकरी यांनी व्यक्त केली. 

दिल्लीतील महाराष्ट्र सदन येथे  सरहदच्या वतीने आयोजित कार्यक्रमात ‘सकाळ’ पुणे आवृत्तीचे वृत्तसंपादक धनंजय बिजले लिखित महामुद्रा या पुस्तकाचे प्रकाशन केंद्रीय मंत्री नितीन गडकरी आणि ज्येष्ठ नेते शरद पवार यांच्या हस्ते मंगळवारी झाले. या वेळी शरद पवार यांच्या हस्ते गडकरी यांना चिंतामणराव देशमुख राष्ट्रीय पुरस्कार देऊन सन्मानित करण्यात आले.

त्या वेळी श्री. गडकरी बोलत होते. या वेळी ज्येष्ठ पत्रकार राजीव खांडेकर, नागपूरच्या वनराई फाऊंडेशनचे डॉ. गिरीश गांधी प्रमुख पाहुणे म्हणून उपस्थित होते. या प्रसंगी शरद पवार यांनी भाषणात महाराष्ट्रातील नेत्यांच्या दिल्लीतील कर्तृत्वाचे दाखले दिले.

‘महामुद्रा’त दिल्लीतील मराठी नेतृत्वाचे कर्तृत्व

दिल्लीमध्ये मराठी नेत्यांनी बजावलेल्या देदीप्यमान कामगिरीची एकत्रित मांडणी महामुद्रा या पुस्तकात करण्यात आली आहे. हे पुस्तक दोन खंडांमध्ये प्रकाशित होणार आहे. डॉ. बाबासाहेब आंबेडकर, दादासाहेब मावळणकर, काकासाहेब गाडगीळ, यशवंतराव चव्हाण,

सी. डी.  देशमुख, शंकरराव चव्हाण, मधु दंडवते, वसंत साठे, शरद पवार, शिवराज पाटील, मोहन धारिया, राम नाईक, विठ्ठलराव गाडगीळ, सुशीलकुमार शिंदे आणि नितीन गडकरी या नेत्यांची कामगिरी शब्दबद्ध केली आहे. मुख्यमंत्री देवेंद्र फडणवीस यांची प्रस्तावना आहे.