Kokate Rummy Video : जुगारू कृषिमंत्र्याला मुख्यमंत्री करा; शरद पवार गटाची मागणी

Manikrao Kokate : कृषिमंत्री माणिकराव कोकाटेंचं विधिमंडळात रमी खेळण्याचं प्रकरण चांगलेच तापलं आहे. राज्य सरकारचं भिकारी आहे, असं म्हणत कृषिमंत्र्यांना पुन्हा नव्या वादाला तोंड फोडलं. कृषिमंत्र्यांच्या या वक्तव्यावरून शरदचंद्र पवार राष्ट्रवादी कॉंग्रेसने पुणे जिल्हाधिकारी कार्यालयासमोर बुधवारी (ता.२३) जुगार खेळत आंदोलन करून मुख्यमंत्री देवेंद्र फडणवीस यांच्या राजीनाम्याची मागणी केली आहे. यावेळी शरदचंद्र पवार राष्ट्रवादी कॉंग्रेस पुणे शहराध्यक्ष प्रशांत जगताप यांनी शेतकरी आत्महत्यावरून सरकारवर हल्लाबोल केला.

मुख्यमंत्री कृषिमंत्र्यांना वारंवार सांभाळून घेत असल्याची टीका पुणे शहराध्यक्ष जगताप यांनी केली. "काल (ता.२२) कृषिमंत्री कोकाटे यांनी महाराष्ट्र शासन भिकारी आहे, असं विधान केलं. परंतु तरीही मुख्यमंत्री देवेंद्र फडणवीसांनी त्यांचा राजीनामा घेतला नाही. त्यामुळे मुख्यमंत्र्यांचा उद्देश स्पष्ट आहे, शेतकऱ्यांनी शेती करू नये, तरुणांनी आयटीत काम करू नये. त्याऐवजी कल्याण मटका, सोरट, मटका, पोकर गेम खेळवा, अशी मुख्यमंत्र्यांची इच्छा दिसते." असे जगताप म्हणाले.

पुढे जगताप यांनी मुख्यमंत्र्यांनी राजीनामा देऊन कृषिमंत्री माणिकरावांना मुख्यमंत्री करण्याची मागणी केली. "राज्यावर १० लाख कोटीचं कर्ज आहे. या कर्जातून केवळ जुगारडा माणिकराव कोकाटे वाचवू शकतो. कालपर्यंत आमची मागणी होती की, कृषिमंत्र्यांचा राजीनामा घ्यावा, परंतु आता मात्र खुद्द मुख्यमंत्र्यांनी राजीनामा देऊन कृषिमंत्री माणिकरावांना मुख्यमंत्री करावं. माणिकराव मुख्यमंत्री झाले तर अट्टल जुगारडा मंत्री राज्याला लाभेल, हा माणूस रोज रमी आणि मटका खेळून राज्यावरचं १० लाख कोटी रुपयांचं कर्ज संपवेल. त्यामुळे शेतकऱ्यांना आत्महत्या करणार नाही." असा टीकाही जगताप यांनी केली.

कृषिमंत्री माणिकराव कोकाटे यांचे वादग्रस्त विधान आणि रमी प्रकरणामुळे अडचणी वाढत आहे. मुख्यमंत्री देवेंद्र फडणवीस यांनी कोकाटे यांच्या विधानांवरून नाराजी व्यक्त केली आहे. परंतु राजीनामा घेतला नाही, त्यामुळे विरोधकांनी सरकारवर टीकेची झोड उठवली आहे. तसेच कृषिमंत्र्यांच्या राजीनाम्याची मागणी केली आहे.

दरम्यान, एक रुपया भिकारी घेत नाही, या विधानाबद्दल पत्रकार परिषदेत स्पष्टीकरण देताना कृषिमंत्री कोकाटेंनी राज्य शासन भिकारी असल्याचे विधान केले. त्यावरून राजकीय वातावरण तापले आहे.