Automated Weather Systems: स्वयंचलित हवामान यंत्रांची तज्ज्ञांमार्फत तपासणी करा

Nanded News: नांदेड जिल्ह्यात स्वयंचलित हवामान यंत्रांच्या तपासणीत अनेक यंत्रे सदोष आढळली होती. यामुळे बागायती केळी उत्पादक शेतकऱ्यांच्या नुकसानीबाबत जिल्ह्यातील स्वयंचलित हवामान यंत्रांची तज्ज्ञांच्या मार्फत तपासणी करावी, अशी मागणी स्वाभिमानी शेतकरी संघटनेच्या वतीने प्रशासनाकडे करण्यात आली आहे. नांदेड जिल्ह्यात अर्धापूर, मुदखेड, भोकर व नांदेड तालुक्यांसह जिल्ह्याच्या इतर भागांत बागायती केळीचे उत्पादन मोठ्या प्रमाणावर घेतले जाते.

केळी पिकासाठी शेतकऱ्यांना मोठ्या प्रमाणात आर्थिक गुंतवणूक करावी लागते. परंतु सध्या मागील काही वर्षांपासून हवामानातील प्रतिकूल बदलामुळे केळीला गारपीट, अति उष्णता, अतिथंडी, वादळीवारे या संकटाचा फटका बसत आहे. परिणामी, शेतकऱ्यांच्या हातात आलेले पीक उद्‍ध्वस्त होऊन शेतकऱ्यांचे कोट्यवधी रुपयांचे नुकसान होत आहे.

या सर्व संकटापासून आर्थिक संरक्षण मिळावे याकरिता केळी उत्पादक शेतकरी हवामान आधारित पीकविमा योजनेमध्ये सहभाग नोंदवितात. पीकविमा योजनेमध्ये, स्वयंचलित हवामान यंत्रांच्या हवामानाच्या नोंदीनुसार शेतकऱ्यांना पीकविमा परतावा ठरत असतो. या नोंदी अचूकपणे घेणे अत्यंत महत्त्वाचे आहे.

यापूर्वी ऑक्टोबर २०२० मध्ये झालेल्या स्वयंचलित हवामान यंत्रांच्या तपासणीत अनेक यंत्रे सदोष आढळली होती. त्यामुळे त्या वेळी बागायती केळी उत्पादक शेतकऱ्यांना पीकविम्याची कुठलाच लाभ झाला नव्हता.

ही बाब लक्षात घेता बागायती केळी उत्पादक शेतकऱ्यांच्या होणाऱ्या आर्थिक नुकसानीची तीव्रता या विषयावर तातडीची बैठक आयोजित करून नांदेड जिल्ह्यातील स्वयंचलित हवामान यंत्रांची तज्ज्ञांमार्फत तपासणी करण्याचे आदेश देण्यात यावेत, अशी मागणी स्वाभिमानी शेतकरी संघटनेच्या वतीने निवासी उपजिल्हाधिकारी महेश वडदकर यांच्याकडे करण्यात आली आहे. या वेळी स्वाभिमानी शेतकरी संघटनेचे हनुमंत राजेगोरे, किशनराव कदम, तालुकाध्यक्ष बालाजी कल्याणकर, युवा आघाडीचे नरहरी पोपळे, माणिक राजेगोरे उपस्थित होते.