Solapur News : उजनी धरण परिसरात दोन दिवसांपूर्वी झालेल्या वादळी वाऱ्यासह पूर्वमोसमी पावसाने उजनी जलाशयाच्या काठावरील कंदर, फुटजवळगाव परिसरातील केळी, ऊस, पपई आदी पिके जमीनदोस्त झाली आहेत. अनेक शेतकऱ्यांची काढणीला आलेली पिके भुईसपाट झाल्याने लाखो रुपयांचे नुकसान झाले आहे, शासनाने तातडीने नुकसानीचे पंचनामे करण्याची मागणी या शेतकऱ्यांनी केली आहे.
उजनी धरणामुळे जलाशयाचा काठ सुजलाम्, सुफलाम् झालेला आहे. या भागात ऊस, केळी, फळबागा व भाजीपाल्याची पिकांची लागवड झाली आहे. परंतु ता. १४ रोजी उजनी धरण परिसरातील माढा तालुक्यातील फुटजवळगाव व करमाळा तालुक्यातील कंदर आदी भागाला वादळी वाऱ्यासह जोरदार पावसाने तडाखा दिला.
या वादळी वाऱ्यामुळे उजनी जलाशयाच्या काठावरील केळी, ऊस, पपई ही पिके भुईसपाट झाली. तसेच आंबा फळबागेला फटका बसला. या वादळी वाऱ्यामुळे अकोलेखुर्द येथील शेतकरी विरुपाक्ष ऊर्फ राजाभाऊ तोडकर यांच्या कंदर हद्दीतील तीन एकर केळी पिकाचे नुकसान झाले.
तसेच अनिल तोडकर, गजानन तोडकर यांची चार एकर केळी, रामभाऊ तोडकर, बिभीषण तोडकर, दादासाहेब जगताप, फुटजवळगाव येथील वामनराव नवले, बापू पवार, दादा नवले, विठ्ठल नवले, समाधान पाटील, समाधान नवले, कदम, लांडगे, अकोले-खुर्द येथील संपत पाटील, बाळू पाटील, सुनील नवले,
नागा डाकवले, बाबा निकम, बाबा शिंदे, म्हांकाळ शिंदे, चंद्रकांत तोडकर, नवनाथ मासाळ, नागेश पाटील, बबन राऊत, गणेश राऊत आदींची ऊस, केळी ही पिके वादळी वाऱ्यामुळे जमीनदोस्त झाल्याने मोठे आर्थिक नुकसान झाले आहे. आता मदतीशिवाय या शेतकऱ्यांसमोर पर्याय नाही.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.