Shirur News : ‘‘शिरूर तालुक्यात वादळी वारा व गारांसह पूर्वमोसमी पावसाने शेतकऱ्यांचे मोठ्या प्रमाणात नुकसान झाले आहे. नुकसानग्रस्त शेतीचे प्रशासनाने त्वरित पंचनामे करावेत,’’ अशा सूचना आमदार अशोक पवार यांनी प्रशासनाला केल्या आहेत.
शिरूरच्या पूर्व भागातील मांडवगण फराटा, गणेगाव दुमाला, तांदळी, इनामगाव, पिंपळसुटी परिसरांत डाळिंब, केळी, ऊस व तरकारी पिकांचे मोठ्या प्रमाणात नुकसान झाले तसेच घर व पोल्ट्री शेडवरील पत्रे उडून गेल्याने अनेकांचे लाखो रुपयांचे नुकसान झाले.
मांडवगण फराटा येथील नुकसानग्रस्त शेतीची आमदार अशोक पवार (Ashok Pawar) यांनी पाहणी केली. त्यावेळी पवार बोलत होते. घोडगंगा कारखान्याचे संचालक संभाजी फराटे, दत्तात्रेय फराटे, शंकर फराटे, रावसाहेब जगताप, मारुती घाडगे, राजेंद्र जगताप, सुनील जगताप या वेळी उपस्थित होते.
आमदार पवार म्हणाले, ‘‘शिरूर तालुक्यात अनेक गावांत पावसामुळे डाळिंब, ऊस, केळी, पोल्ट्री पत्राशेड व घरांचे नुकसान झाले. निवडणुकीच्या कामकाजामुळे प्रशासकीय अधिकारी सध्या व्यग्र असले तरीही येत्या दोन दिवसांत महसूल प्रशासनाने त्वरित पंचनामे करावेत. तोडणीस आलेले अनेक शेतकऱ्यांचे डाळिंब गळून पडले आहेत.
डाळिंब पिकातील क्रॉपकव्हर देखील फाटले आहे. राज्य सरकारने शेतकऱ्यांना भरीव मदत जाहीर करून दिलासा द्यावा. वळवाच्या अचानक झालेल्या पावसामुळे झालेल्या नुकसानीबाबत विधानसभेच्या येत्या अधिवेशनात आवाज उठवणार असून शेतकऱ्यांना मदत मिळवून देण्यासाठी प्रयत्नशील आहे.’’
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.