EC Controversy: आयोगाचा शपथपत्राचा आग्रह अनाकलनीय: पवार

Nagpur News: ‘‘मत चोरी प्रकरणी राहुल गांधी यांनी पत्रकार परिषदेतून उपस्थित केलेले कोणतेही मुद्दे अद्याप निवडणूक आयोगाकडून अधिकृतरीत्या खोडण्यात आले नाहीत. त्याच वेळी गांधी यांना चर्चेसाठी बोलावताना शपथपत्राची अट घालण्यात आली. परंतु त्यांनी पूर्वीच शपथ घेतली असल्याने आता शपथपत्राची गरज नाही. त्यामुळे निवडणूक आयोगाचा शपथपत्राविषयीचा आग्रह अनाकलनीय आहे,’’ अशी टीका राष्ट्रवादी काँग्रेस पक्ष (शरदचंद्र पवार) अध्यक्ष शरद पवार यांनी केली.

मंडल यात्रेच्या निमित्ताने श्री. पवार हे शनिवारी (ता.९) नागपूर दौऱ्यावर होते. त्या वेळी त्यांनी पत्रकारांशी संवाद साधताना साधला. या वेळी ते म्हणाले, की मत चोरी संबंधातील तथ्यांची मांडणी राहुल गांधी यांनी अभ्यासातून केली आहे. निवडणूक आयोगाने त्यावर स्पष्टीकरण देणे अपेक्षित होते.

मात्र त्याऐवजी श्री. गांधी यांनाच शपथपत्राची मागणी केली जात आहे. आयोगाचा हा आग्रह अजिबात योग्य नाही. गांधी यांनी जे सादरीकरण केले, त्याप्रकरणी खोलात जाण्याची गरज आहे. घटनात्मक लोकशाहीविषयी लोकांच्या मनात शंका निर्माण होणे योग्य नाही. त्यामुळे याची सखोल चौकशी झाली पाहिजे. ‘दूध का दूध, पानी का पानी’ व्हावे, अशी प्रत्येक भारतीयांची इच्छा असून, आमचा देखील आग्रह आहे.

श्री. गांधी यांच्या आरोपासंदर्भात मुख्यमंत्री देवेंद्र फडणवीस यांनी खुलासा केला होता. श्री. पवार म्हणाले, की आक्षेप निवडणूक आयोगावर आहे. त्याचा खुलासा करण्यासाठी आयोगानेच पुढे येणे अपेक्षित आहे. भाजप किंवा मुख्यमंत्र्यांनी मत मांडायला पुढे येण्याची गरज नाही. आम्हाला निवडणूक आयोगाकडून उत्तर हवे आहे.

‘१६० जागा जिंकून देण्याचा दावा’

श्री. पवार म्हणाले, की विधानसभा निवडणूक जाहीर झाली. त्याच वेळी दिल्लीत मला काही लोक भेटायला आले. त्यात दोन जण होते. त्यांचे नावे व पत्ता माझ्याकडे नाही. त्यांनीही ते दिले नव्हते. ते म्हणाले होते, की महाराष्ट्र विधानसभेच्या २८८ पैकी १६० जागा जिंकून देतो. पण त्या वेळी माझ्या मनात निवडणूक आयोगाविषयी शंका नव्हती. त्यामुळे संबंधिताकडे दुर्लक्ष केले. हे झाल्यानंतर त्या व्यक्‍तींची आणि राहुल गांधी यांची मी भेट घालून दिली. त्यानंतरच्या काळात मी या प्रकरणी जनतेच्या दरबारात जाण्याची भूमिका घेऊन दुर्लक्ष केले. आता मतचोरी उघड झाल्यानंतर हे सारे संशयास्पद असल्याचे दिसत आहे.