Chhatrapati Sambhajinagar News: मॅजिक (मराठवाडा एक्सलरेटर फॉर ग्रोथ ॲण्ड इनक्युबेशन कौन्सिल) या इनक्युबेशन केंद्राच्या पहिल्या स्टार्टअपपैकी एक असलेल्या मूळ चित्तेपिंपळगाव येथील शेतकरी पुत्र योगेश गावंडे यांच्या नियो फार्मटेकने ‘ग्रीनोव्हेशन एनर्जी चॅलेंज’मध्ये टॉप १० मध्ये स्थान मिळवले आहे. त्यांच्या नावीन्यपूर्ण पेस्टिसाइड स्प्रे पंपची जागतिक टेक उद्योजक बिल गेट्स यांनी विशेष दखल घेतली आहे.
भारतीय कृषी संशोधन संस्था (आयएआरआय) दिल्ली येथे मेला ग्राऊंडवर १७ मार्चला हा योग आला. कार्यक्रमात नियो फार्मटेकच्या नियो सोलर स्प्रेअर आणि नियो बाहुबली स्प्रेअर या अत्याधुनिक तंत्रज्ञानाचा बिल गेट्स यांनी केवळ निरीक्षण न करता स्वतः अनुभव घेतला. सोलर-चलित स्प्रेअर पारंपरिक इंधन-आधारित स्प्रेअर्सच्या तुलनेत अधिक किफायतशीर आणि पर्यावरणपूरक पर्याय उपलब्ध करून देते.
त्यांनी नियो बाहुबली स्प्रेअरची देखील चाचणी केली, जे मोठ्या प्रमाणावर शेती करणाऱ्या शेतकऱ्यांसाठी अधिक कार्यक्षमतेचे आणि मजूर खर्च वाचविणारे तंत्रज्ञान आहे. बुधवारी (ता. १९) छत्रपती संभाजीनगरमध्ये झालेल्या पत्रकार परिषदेत या घटनेविषयी सविस्तर माहिती देण्यात आली. या वेळी मॅजिकचे संचालक प्रसाद कोकीळ, ऑनलाइन पद्धतीने आशिष गर्दे, नियो फार्मटेकचे संस्थापक योगेश गावंडे उपस्थित होते.
श्री. कोकीळ म्हणाले, की विद्यार्थी दशेतून महाविद्यालयीन प्रोजेक्टला प्रत्यक्ष प्रोडक्टमध्ये रूपांतर करण्यात आले. मॅजिक संस्थेने उत्पादन विकासात मोलाची भूमिका निभावली. मॅजिकच्या सहकार्याने, नियो फार्मटेकचा ‘सोशल अल्फो’ आणि सीओइ फसल एसटीपाआय, आयआयटी कानपूर, आयआयएमसीआयपी, बीवायएसटी आणि वायबीआय यांसारख्या महत्त्वाच्या संस्थांशी संपर्क झाला.
ज्यामुळे स्टार्टअपला गती मिळाली. आज, नियो फार्मटेकने ५ हजारांपेक्षा जास्त युनिट्सची विक्री, १०० पेक्षा जास्त रोजगार निर्मिती आणि ३ कोटींहून अधिक महसूल मिळवला आहे. संस्थापक योगेश गावंडे यांनी मॅजिकच्या अमूल्य योगदानाबद्दल कृतज्ञता व्यक्त केली. गेल्या दोन वर्षांत, गेट्स फाउंडेशनच्या मदतीने नियो फार्मटेकने उत्तर प्रदेश आणि ओडिशा येथे आपले उत्पादन मोठ्या प्रमाणावर पोहोचवले आणि नावीन्यपूर्ण कृषी उपाय उपलब्ध करून दिले. या संपूर्ण प्रवासात महाराष्ट्र स्टेट इनोव्हेशन सोसायटीने मोलाची मदत केल्याचे श्री. गावंडे म्हणाले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.