Water Level : सांगली जिल्ह्यातील भूजल पातळीत वाढ

सांगली ः जिल्ह्यात यंदाच्या पावसाळ्यात व परतीचा पाऊस (Rain) यामुळे तलाव, विहिरींच्या पाणीसाठ्यात (Water Stock) लक्षणीय वाढ झाली असल्याने भूजल पातळीत (Groundwater Level) वाढ झाली आहे. यंदा ऑक्टोबर-२०२२ अखेर जिल्ह्यातील भूजल पातळीत ०.९७ मीटरने वाढ झाली असल्याची माहिती वरिष्ठ भूवैज्ञानिक भूजल सर्वेक्षण आणि विकास यंत्रणा कार्यालयातून देण्यात आली.

भूजल सर्वेक्षण आणि विकास यंत्रणा कार्यालयामार्फत ऑक्टोबर २०२२ अखेर जिल्ह्यातील ८६ विहिरींचे निरीक्षण करण्यात आले. यामध्ये ऑक्टोबर-२०२२ मध्ये २.६८ मीटर स्थिर भूजल पातळी आढळून आली. ही वाढ सरासरी ०.९७ मीटर आहे. यामध्ये मिरज तालुक्यातील ६ विहिरींची तपासणी करण्यात आली असता, स्थिर भूजल पातळी २.४५ मीटर असून ऑक्टोबरअखेर ०.१३ मीटरची वाढ आढळून आली.

जत तालुक्यातील २० विहिरींची तपासणी करण्यात आली असता, स्थिर भूजल पातळी ३.३९ मीटर असून ऑक्टोबर-२०२२ अखेर १.८५ मीटरची वाढ आढळून आली. खानापूर तालुक्यातील ९ विहिरींच्या तपासणीत स्थिर भूजल पातळी २.९४ मीटर असून, ऑक्टोबरअखेर १.१३ मीटरची वाढ आढळून आली. वाळवा तालुक्यातील ६ विहिरींची तपासणी केली, स्थिर भूजल पातळी १.६१ मीटर, तर ऑक्टोबरअखेर ०.३३ मीटरची वाढ आढळली.

तासगाव तालुक्यातील ३ विहिरींची तपासणी झाली, स्थिर भूजल पातळी ४.४२ मीटर, तर ऑक्टोबरअखेर १.३१ मीटरची वाढ आढळली. शिराळा तालुक्यातील ६ विहिरींच्या तपासणीत स्थिर पातळी ०.८९ मीटर व ऑक्टोबरअखेर ०.२१ मीटरची वाढ आढळली. आटपाडी तालुक्यातील १३ विहिरींची तपासणी केली, स्थिर पातळी ३.२९ मीटर, तर ऑक्टोबरअखेर १.०९ मीटरची वाढ झाली.

कवठे महांकाळ तालुक्यातील १५ विहिरींच्या तपासणीत स्थिर पातळी २.६७ मीटर, तर ऑक्टोबरअखेर १.८५ मीटरची वाढ झाली. पलूस तालुक्यात २ विहिरींच्या तपासणीनंतर स्थिर पातळी १.४५ मीटर, तर ऑक्टोबरअखेर १.१५ मीटरची वाढ आढळली. कडेगाव तालुक्यातील ६ विहिरींची तपासणी केली असता स्थिर भूजल पातळी ३.६५ मीटर असून, ऑक्टोबर २०२२ अखेर ०.६३ मीटरची वाढ आढळून आली.