Agriculture Electricity : मोहोळला मिळाले सहा ट्रान्स्फॉर्मर, शेतकऱ्यांची झाली सोय

Agriculture Electricity News मोहोळ, जि. सोलापूर ः मोहोळजवळील विविध सहा वस्त्यांसाठी जिल्हा नियोजन योजने (डीपीडीसी) अंतर्गत सहा ट्रान्स्फॉर्मर (Transformer) मंजूर झाले असून, त्यापैकी एका ट्रान्स्फॉर्मरचे (Agriculture Elctricity) काम पूर्ण झाले आहे.

त्याचे उद्‍घाटन काळे वस्तीवरील ज्येष्ठ नागरिक ब्रह्मदेव गायकवाड यांच्या हस्ते नुकतेच करण्यात आले. या सर्व ट्रान्स्फार्मरमुळे या परिसरातील सुमारे दोनशे शेतकऱ्यांची मोठी सोय झाली आहे.

भाजपचे माजी तालुका अध्यक्ष सतीश काळे यांनी दिलेल्या माहितीनुसार, मोहोळजवळील काळे वस्ती, जाधव वस्ती, कवठे मरकुरी वस्ती, राऊत वस्ती, गायकवाड व सुतार वस्ती, शिंदे वस्ती, कुरडे वस्ती या ठिकाणच्या शेतकऱ्यांना विजेच्या समस्यांना गेल्या अनेक दिवसांपासून तोंड द्यावे लागत होते.

ट्रान्स्फॉर्मर जळणे, विद्युत पंप जळणे, कमी दाबाने वीज मिळणे या समस्या नित्याच्याच होत्या. अगोदरच्या ट्रान्स्फॉर्मरवर जादा ताण असल्याने तोही जळत होता. या भागातील शेतकऱ्यांनी नवीन ट्रान्स्फॉर्मरची मागणी काळे यांच्याकडे केली होती.

काळे यांनी वरील सहा ट्रान्स्फार्मरचे प्रस्ताव तयार करून महावितरणकडे दाखल केले होते. दरम्यान, आमदार सुभाष देशमुख यांच्या मार्फत काळे यांनी वेळोवेळी केलेल्या पाठपुराव्याला यश आले आणि सहा ट्रान्स्फॉर्मर मंजूर झाले.

त्यामुळे खंडित वीजपुरवठा व अन्य अडचणींपासून या भागातील शेतकऱ्यांची सुटका झाली. यावेळी धोंडीबा गायकवाड, सुरेश राऊत, सागर देवकर, शाहू धोत्रे, सचिन काळे, किरण देशमुख, बाळू देशमुख, गणेश काळे, योगेश काळे, शीतल देशमुख उपस्थित होते.