वाशी ः दिवाळीपासून घाऊक बाजारात तांदळाची आवक मोठ्या प्रमाणात होते. त्यानुसार यंदाही मुंबई घाऊक बाजारात तांदूळ यायला सुरुवात झाली आहे. मात्र, बासमतीच्या दरात सध्या परदेशात होणाऱ्या निर्यातीच्या तुलनेत कमी झालेल्या उत्पादनामुळे घाऊक बाजारात किलोमागे १० ते १५, तर किरकोळ बाजारात २० ते २५ रुपयांनी सुधारले आहेत.
वाशीतील मुंबई कृषी उत्पन्न बाजार समितीमधील घाऊक बाजारात तांदळाची आवक सुरू झाली आहे. मे महिन्यापर्यंत मोठ्या प्रमाणात ही आवक होत राहणार आहे. सध्या घाऊक बाजारात पंजाब, मध्य प्रदेश, गुजरात, कर्नाटक, आंध्र प्रदेश या राज्यांमधून तांदळाची आवक मोठ्या प्रमाणात होत आहे; तर महाराष्ट्रातील गोंदिया, चंद्रपूरमधूनही तांदूळ येतो. घाऊक बाजारात तांदळाची मासिक आवक सरासरी तीन ते चार लाख क्विंटल इतकी आहे. यामध्ये बासमती तांदळाची आवक सरासरी पंचावन्न ते साठ हजार क्विंटल इतकी असते. मागच्या दोन वर्षांत लॉकडाऊनमुळे बासमती तांदळाची मागणी नसल्याने दर पन्नास टक्क्यांनी घसरले होते.
लग्नसराईमुळे अधिक मागणी
बासमती तांदळाला दररोजच्या जेवणासाठी मागणी कमीच असते. पण या तांदळाचा सुगंध आणि चवीमुळे सण-समारंभ, उत्सव, कार्यक्रमांमध्ये या तांदळाला अधिक मागणी असते. अशातच सध्या लग्नसराईही सुरू आहे. त्यामुळे केटरिंग, हॉटेल चालकांकडून बासमतीला मागणी आहे. शहरात सण-समारंभ, लग्न आणि इतर कार्यक्रमही आता उत्साहाने होत आहेत.
बासमती तुकडा तांदळाच्या भावातही ७ ते १० रुपयांची वाढ झाली आहे. ऑक्टोबरमध्ये बासमती तुकडा ३१ ते ४१ रुपये प्रतिकिलो होता. आता तो ४० ते ६० रुपये प्रतिकिलो झाला आहे. तसेच यंदा बासमतीचे उत्पादन कमी झाल्याने बाजारात आवक कमी होत आहे. त्यामुळे घाऊक बाजारात काही प्रमाणात बासमती तांदळाचे दर सुधारले आहेत.
- भरत भानुशाली, व्यापारी
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
