Soybean Market : आंतरराष्ट्रीय बाजारात सोयाबीन दर सुधारले

आंतरराष्ट्रीय बाजारात सोयाबीनच्या दरात (Soybean Rate Today) आज काहीशी सुधारणा पाहायला मिळाली. मात्र देशातील सोयाबीन दर मागील काही दिवसांपुर्वी नरमले होते. ते आजपर्यंत स्थिर आहेत. पण आता देशातील सोयाबीन उत्पादकांनाही दिलासा मिळण्याची शक्यता आहे. आता सोयाबीनचे दर सुधारण्याची शक्यता निर्माण झाली. पण सोयाबीनचे दर कधी सुधारतील? दरात किती वाढ होऊ शकते?

आंतररराष्ट्रीय बाजारात आज सोयाबीन, सोयातेल आणि सोयापेंडच्या दरात काहीशी सुधारणा पाहायला मिळाली. सोयाबीनचे वायदे जवळपास १ टक्क्याने सुधारून १४.४८ डाॅलर प्रतिबुशेल्सवर पोचले होते. तर सोयातेलाच्या वायद्यांमध्ये जवळपास दीड टक्क्याने वाढ झाली होती. आज सोयातेलाचे वायदे ६३.४३ सेंट प्रतिपाऊंडवर पोचले होते. मागील आठवड्यात सोयातेल जवळपास ११ टक्क्यांनी पडले होते. मात्र किमान पातळीवरून सोयातेलाच्या दरात आता सुधारणा दिसून येत आहे.

सोयापेंडचे दरही आंतरराष्ट्रीय बाजारात सुधारले आहेत. सोयापेंडचे दर जवळपास सव्वा टक्क्याने वाढले. आज सोयापेंडचे वायदे ४३३.३५ डाॅलर प्रतिटनाने पार पडले. देशात सध्या सोयाबीन नरमल्याने सोयापेंडचे दरही कमी झाले आहेत. म्हणजेच एकीकडे आंतरराष्ट्रीय बाजारात सोयापेंडचे दर वाढत आहेत. तर देशात दर कमी झाले. त्यामुळे देशातून सोयापेंड निर्यातही वाढली आहे.

दुसरीकडे पामतेलाच्या दरातही आज  सुधारणा पाहायला मिळाली. पामतेलाचे वायदे आज ३ हजार ९२७ रिंगीट प्रतिटनावर बंद झाले. रिंगीट हे मलेशियाचे चलन आहे. बाजारातील अनेक विश्लेषक पामतेल यंदा दबावात राहील असा अंदाज व्यक्त करत होते. मात्र महत्वाच्या पामतेल उत्पादक देशांमध्ये उत्पादन घटीची शक्यता आहे.

इंडोनेशिया सध्या जैवइंधनामध्ये ३० टक्के पामतेलाचा वापर करत आहे. यापुढे जाऊन इंडोनेशियाने ३५ टक्के तेल वापरण्याचे उद्दीष्ट जाहीर केले होते. आता इंडोनेशियाच्या राष्ट्रपतींनी ३५ टक्के पामतेल वापरासाठी तयार राहण्यास सांगितले आहे. म्हणजेच इंडोनेशिया जैवइंधनात पामतेलाचा वापर जास्त करणार आहे. त्यामुळे पामतेलाची उपलब्धता कमी होईल. या बातमीनंतर पामतेलाच्या दरात सुधारणा पाहायला मिळाली. इंडोनेशियाने हे धोरण राबविल्यास पामतेलाच्या दरात आणखी वाढ होण्याचा अंदाज आहे. असे झाल्यास सोयातेलाचे दरही सुधारु शकतात, असा अंदाज जाणकारांनी व्यक्त केला.

देशात आज सोयाबीनचे दर काहीसे स्थिर होते. बाजारात आज जवळपास अडीच लाख क्विंटल सोयाबीनची आवक झाल्याचं व्यापाऱ्यांनी सांगितलं. तर सोयाबीनला आजही ५ हजार २०० ते ५ हजार ५०० रुपये सरासरी दर मिळाला. काही बाजारांमध्ये दर यापेक्षा जास्त होता. मात्र अशा बाजारांची संख्या नगण्य आहे. तर प्रक्रिया प्लांट्सचे दर आजही ५ हजार ४०० ते ५ हजार ७०० रुपयांच्या दरम्यान होते.

सध्या आंतरराष्ट्रीय बाजारात सोयाबीन आणि सोयातेलाचे दर वाढीसाठी काही घटक अनुकूल दिसत आहेत. त्यामुळे देशातील सोयाबीन बाजारालाही आधार मिळू शकतो. त्यामुळे सोयाबीनच्या दरात क्विंटलमागे १५० ते २०० रुपयांपर्यंत सुधारणा होऊ शकते. त्यामुळे शेतकऱ्यांनी बाजाराचा आढावा घेऊनच सोयाबीनची विक्री करावी, असं आवाहन जाणकारांनी केले आहे.