Sugarcane Bill : राजारामबापू कारखान्याचे अंतिम बिल १८९.८५ प्रमाणे

इस्लामपूर, जि. सांगली ः राजारामबापू पाटील साखर कारखान्याकडे (Rajarambapu Sugar Factory) २०२१-२२ मध्ये गळितास आलेल्या साखराळे युनिट नं. एक, वाटेगाव- सुरुल युनिट नं. दोन व कारंदवाडी युनिट नं. तीनकडील उसास प्रतिटन २९८९.८५ चे अंतिम बिल देण्याचा निर्णय संचालक मंडळाने घेतला असून आतापर्यंत २८०० रुपयांप्रमाणे ५८३ कोटी २५ लाख रुपये ऊस बिलाची (Sugarcane Bill Payment) रक्कम वर्ग केली आहे.

अंतिम बिल १८९.८५ प्रमाणे एकूण ३९ कोटी ५५ लाख रुपये गुरुवारी (ता. २९) ऊस उत्पादक शेतकऱ्यांच्या बँक खात्यावर वर्ग केली जाणार आहे, अशी माहिती राजारामबापू सहकारी साखर कारखान्याचे अध्यक्ष पी. आर. पाटील यांनी दिली.

कारखान्याने २०२१-२२ मध्ये २० लाख ८३ हजार २२ टन उसाचे गाळप केले आहे. यामध्ये साखराळे युनिटमध्ये १० लाख ५९ हजार ५०० टन, वाटेगाव-सुरुल युनिट मध्ये ५ लाख ७० हजार ८०८ टन, तर कारंदवाडी युनिटमध्ये ४ लाख ५२ हजार ७१३ टन ऊस गाळपाचा समावेश आहे.

आपल्या साखर कारखान्याकडे २०२१-२२ मध्ये गाळपास आलेल्या उसास प्रतिटन रुपये २ हजार ८०० प्रमाणे ५८३ कोटी २५ लाख रुपये यापूर्वीच अदा केले आहेत. कारखान्याच्या साखराळे, वाटेगाव-सुरुल, कारंदवाडी व तिप्पेहळळी (जत) युनिटमध्ये ऑफ सिझनची कामे अंतिम टप्प्यात आली आहेत.

आपली चारही युनिट १५ ऑक्टोबर रोजी सुरू करीत आहोत. साखराळे येथे ११ लाख, वाटेगाव-सुरुल युनिटमध्ये ६ लाख व कारंदवाडी युनिटमध्ये पाच लाख तसेच तिप्पेहळ्ळी- जत युनिटमध्ये चार लाख असे एकूण २६ लाख टनाचे उद्दिष्ट आहे. ऊस उत्पादक शेतकऱ्यांनी आपला सर्व ऊस आपल्या कारखान्यास गळितास पाठवून आपल्या साखर कारखान्याचे उद्दिष्ट पूर्ण करण्यास सहकार्य करावे.