Weather Forecast : मध्य महाराष्ट्र, मराठवाड्यात वादळी पावसाचा इशारा

Pune News : विदर्भासह मराठवाड्यात अवकाळी पाऊस आणि गारपिटीने तडाखा दिला आहे. ढगाळ हवामानामुळे उकाडा वाढल्याने किमान तापमानात वाढ झाली आहे. आज (ता. २९) कोकण, मध्य महाराष्ट्र आणि मराठवाड्यात तुरळक ठिकाणी विजांसह वादळी पावसाचा इशारा (येलो अलर्ट) देण्यात आला आहे. कोकणातही विजांसह पावसाची शक्यता आहे.

राज्याच्या हवामानात सातत्याने चढ-उतार होत आहेत. किमान तापमानाचा पारा वाढल्याने गारठा नाहीसा झाला असून, दुपारी उन्हाचा चटका, उकाड्यामुळे घामटा निघत आहे. बुधवारी (ता. २८) सकाळपर्यंतच्या २४ तासांत सोलापूर येथे राज्यातील उच्चांकी ३६.२ अंश सेल्सिअस तापमानाची नोंद झाली आहे. राज्यात अनेक ठिकाणी कमाल तापमानाचा पारा ३५ अंशांच्या जवळपास आहे.

दक्षिण कर्नाटकपासून कोकण, मध्य महाराष्ट्रापर्यंत हवेचा कमी दाबाचा पट्टा तयार झाला आहे. यामुळे मध्य भारतासह राज्यात ढगाळ हवामान होत आहे. विदर्भ, मराठवाड्यात वादळी पाऊस आणि गारपीट झाली. आज मध्य महाराष्ट्रातील नाशिक, नगर, मराठवाड्यातील छत्रपती संभाजीनगर जिल्ह्यात वादळी पावसाचा इशारा आहे. कोकणात तुरळक ठिकाणी विजांसह पावसाचा अंदाज हवामान विभागाने वर्तविला आहे.

बुधवारी (ता. २८) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३४.८ (१८.१), धुळे ३३.० (१५.५), जळगाव ३३.९ (१८.७), कोल्हापूर ३४.५ (२२.९), महाबळेश्वर २८.८ (१७.६), मालेगाव ३५.० (१९.४), नाशिक ३४.२ (१७.४), निफाड ३२.० (१३.५), सांगली ३५.२ (२२.१), सातारा ३४.८ (२१.५), सोलापूर ३६.२ (२२.८), सांताक्रूझ ३३.६ (२०.६), डहाणू ३२.० (१९.८), रत्नागिरी - (२२.३), छत्रपती संभाजीनगर ३३.६ (१९.७),

नांदेड ३४.२ (२२.४), परभणी ३४.७ (२१.०), अकोला ३२.२ (२०.६), अमरावती ३३.२ (१९.३), बुलडाणा ३१.४ (१८.०), चंद्रपूर ३५.८ (१८.२), गडचिरोली ३३.४ (१९.४), गोंदिया ३२.८ (१८.४), नागपूर ३४.० (१९.८), वर्धा ३५.०(१९.६), वाशीम ३६.० (१८.५), यवतमाळ ३५.० (२०.५).

विजांसह पावसाचा इशारा (येलो अलर्ट) : नाशिक, नगर, छत्रपती संभाजीनगर