Maharashtra Rain Alert : राज्यात काही ठिकाणी पावसाचा अंदाज; राज्याच्या बहुतांशी भागात पावसाची उघडीप राहण्याची शक्यता

Pune News : राज्याच्या बहुतांशी भागात पावसाने उघडीप दिली. तर काही ठिकाणी हलक्या ते मध्यम स्वरुपाच्या सरी पडत आहेत. हवामान विभागाने राज्यातील काही भागात जोरदार पावसाचा अंदाज दिला. 

माॅन्सूनने परतीचा प्रवास सुरु केल्यानंतर राजस्थान आणि गुजरातच्या काही भागातून माघार घेतली होती. परंतु त्यानंतर मात्र सलग ६ व्या दिवशीही माॅन्सूनने आपला मुक्काम कायम ठेवला. आजही माॅन्सूनचा प्रवास थबकला होता. 

हवामान विभागाने आज सिंधुदूर्ग, कोल्हापूर, सांगली, सोलापूर, नांदेड, लातूर, धाराशिव जिल्ह्यात काही ठिकाणी जोरदार पावसाचा अंदाज दिला. तर बीड, सातारा, नाशिक, नंदूरबार, धुळे, रत्नागिरी जिल्ह्यात काही ठिकाणी हलक्या ते मध्यम पावसाचा अंदाज हवामान विभागाने दिला. 

उद्या सिंधुदूर्ग, कोल्हापूर, सांगली, सोलापूर जिल्ह्यात काही ठिकाणी जोरदार पावसाचा येलो अलर्ट हवामान विभागाने दिला. तर धाराशिव, लातूर, बीड, सातारा, पुणे, नगर, रत्नागिरी जिल्ह्यात काही ठिकाणी हलक्या ते मध्यम पावसाचा अंदाज हवामान विभागाने दिला.

तसेच पुढील तीन दिवस म्हणजेच बुधवार, गुरुवार आणि शुक्रवारी राज्यातील काही भागात हलक्या ते मध्यम पावसाचा अंदाज दिला. तर राज्याच्या इतर भागात पावसाची उघडीप राहील, असाही अंदाज हवामान विभागाने दिला.