Maharashtra Rain Alert: आज ५ जिल्ह्यांमध्ये पावसाचा अंदाज; राज्यातील अनेक भागात तापमानात पुन्हा वाढ होण्यास सुरुवात

Pune News: राज्यातील काही ठिकाणी आजही पावसाला पोषक हवामान होते. तर इतर भागात आज उन्हाचा चटका जाणवला. कोकणातील सर्वच जिल्ह्यांना पुढील ५ दिवस उष्ण आणि दमट हवामानाचा इशारा हवामान विभागाने दिला. 

हवामान विभागाने आज कोल्हापूर, सांगली, सोलापूर जिल्ह्यात काही ठिकाणी विजा आणि ढगांच्या गडगाडाटासह हलक्या ते मध्यम पावसाचा येलो अलर्ट जारी केला.

तर लातूर आणि धाराशिव जिल्ह्यात काही ठिकाणी विजा आणि ढगांच्या गडगडाटासह हलक्या सरी पडतील, असाही अंदाज आहे. कोकणातील सर्वच जिल्ह्यांमध्ये आज उष्ण आणि दमट हवामानाचा इशारा देण्यात आला. 

सांगली, सोलापूर, लातूर, धाराशिव, चंद्रपूर आणि गडचिरोली जिल्ह्यात मंगळवार आणि बुधवारी काही ठिकाणी विजा आणि ढगांच्या गडगडाटासह हलक्या ते मध्यम पावसाचा अंदाज देण्यात आला. तसेच या भागात ढगाळ हवामान राहील, असाही अंदाज हवामान विभागाने दिला. 

राज्यातील इतर भागात पावसाचे वातावरण निवळले आहे. त्यामुळे तापमानात पुन्हा वाढ दिसून येत आहे. राज्यातील तापमानात सुधारणाही दिसू शकते, असा अंदाज हवामान विभागाने दिला.