Maharashtra Monsoon Rain: राज्यात काही भागात जोरदार पावसाचा अंदाज; विदर्भ, कोकणातील काही भागात जोर कायम राहणार

Pune News: राज्यातील काही भागात पाऊस हजेरी लावत आहे. तर काही भागात अद्यापही पावसाची प्रतिक्षा आहे. मराठवाडा आणि विदर्भातील काही भागात पावसाने दडी मारली आहे. हवामान विभागाने पुढील ५ दिवस कोकण आणि विदर्भात काही ठिकाणी जोरदार पावसाचा अंदाज दिला. तर मराठवाड्यात पावसाचा जोर कमीच राहण्याची शक्यता आहे.

माॅन्सूनने आज कालच्याच भागात मुक्काम केला होता. काल माॅन्सूनने उत्तर अरबी समुद्राचा आणि हिमाचल प्रदेश तसेच जम्मुचा उरलेला भाग व्यापला होता. तर पश्चिम उत्तर प्रदेशचा आणखी काही भाग, हरियानाचा आणखी काही भाग, चंदीगडचा आणखी काही भाग आणि पंजाबचा आणखी काही भाग माॅन्सूनने व्यापला होता.

माॅन्सूनची सिमा आज बारमेर, जोधपूर, जयपूर, आग्रा, रामपूर, बिजनोर, कर्नाल आणि हलवारा भागात होती. माॅन्सूनच्या वाटचालीसाठी पोषक हवामान आहे. त्यामुळे पुढील ३६ तासांत माॅन्सून राजस्थान, पंजाब आणि हरियानाच्या काही भागात प्रगती करण्याची शक्यता आहे. तर पश्चिम उत्तर प्रदेशाचा उरलेला भागही माॅन्सून व्यापेल, असा अंदाज हवामान विभागाने दिला. 

हवामान विभागाने पुढील ५ दिवस कोकणातील सर्वच जिल्ह्यांमध्ये काही ठिकाणी जोरदार ते अतिजोरदार पावसाचा अंदाज दिला. तर मध्य महाराष्ट्रातील घाटमाथ्यावरही पावसाचा जोर राहण्याची शक्यता आहे. विदर्भातील सर्वच जिल्ह्यांमध्येही पुढील ५ दिवस काही ठिकाणी जोरदार पावसाचा येलो अलर्ट देण्यात आला. तर मराठवाड्यातील छत्रपती संभाजीनगर, जालना, परभणी, नांदेड आणि हिंगोली जिल्ह्यातही काही ठिकाणी जोरदार पावसाची शक्यता आहे. तर इतर जिल्ह्यांमध्ये काही ठिकाणी हलक्या ते मध्यम पावसाची शक्यताही हवामान विभागाने दिली.