Heavy Rain Alert : कोकण, घाटमाथ्यावर जोरदार पावसाची शक्यता

Pune News : बंगालच्या उपसागरात नव्याने कमी दाब क्षेत्राची निर्मिती झाली आहे. कोकण, घाटमाथ्यासह विदर्भात पावसाला पोषक हवामान होत आहे. आज (ता. ६) कोकण, घाटमाथ्यावर तुरळक ठिकाणी जोरदार तर विदर्भात विजांसह पावसाचा इशारा देण्यात आला आहे. तर उर्वरित राज्यात ढगाळ हवामानासह हलक्या सरींची शक्यता हवामान विभागाने वर्तविली आहे.

बंगालच्या उपसागरातील चक्राकार वाऱ्यांच्या प्रभावामुळे उत्तर आंध्र प्रदेश आणि दक्षिण ओडिशाच्या किनाऱ्यालगत कमी दाब क्षेत्राची निर्मिती झाली आहे. मॉन्सूनचा आस राजस्थानच्या सुरतगड पासून रोहतक, ओराई, मंडला, कमी दाबाचे केंद्र ते पूर्व-मध्य बंगालच्या उपसागरापर्यंत सक्रिय आहे. उत्तर अंदमान समुद्र आणि परिसरावर चक्राकार वाऱ्यांची स्थिती आहे.

पावसाने उघडीप दिल्याने कमाल तापमानात वाढ होऊ लागली आहे. गुरुवारी (ता. ५) सकाळपर्यंतच्या २४ तासांमध्ये नागपूर येथे उच्चांकी ३३.४ अंश तापमानाची नोंद झाली. कोकण, मध्य महाराष्ट्राच्या घाटमाथ्यावर तुरळक ठिकाणी मध्यम ते जोरदार, तर विदर्भ, मराठवाड्यात हलक्या सरी शिंपण करत आहेत.

आज (ता. ६) कोकणातील रायगड, सिंधुदुर्गसह पुणे आणि सातारा जिल्ह्यांच्या घाटमाथ्यावर जोरदार पावसाचा इशारा (येलो अलर्ट) आहे. तर विदर्भात विजांसह पावसाची शक्यता असून, उर्वरित राज्यात मुख्यतः उघडिपीसह हलक्या सरींचा अंदाज हवामान विभागाने वर्तविला आहे.

जोरदार पावसाचा इशारा (येलो अलर्ट) :

रायगड, सिंधुदुर्ग, पुणे, सातारा.

विजांसह पावसाचा इशारा (येलो अलर्ट) :

बुलढाणा, अकोला, वाशीम, अमरावती, यवतमाळ, वर्धा, नागपूर, भंडारा, गोंदिया, चंद्रपूर, गडचिरोली.