Monsoon 2023 : विदर्भ, मराठवड्याच्या काही भागात जोरदार पावसाचा अंदाज !

Heavy rain in Maharashtra : राज्याच्या काही भागात आज पाऊस वाढण्याचा अंदाज आहे. आज सकाळपासूनच राज्याच्या बहुतांशी भागांमध्ये ढगाळ वातावारण होते. तर काही ठिकाणी पावसाने हजेरीही लावली. हवामान विभागाने आज कोकण, मध्य महाराष्ट्राचा काही भाग, खानदेश, मराठवाड्याचा काही भाग विदर्भात ठिकठिकाणी पावसाचा अंदाज दिला.

उत्तर पश्चिम बंगालच्या क्षेत्रात निर्माण झालेली तीव्र दाब क्षेत्राची स्थिती पूर्व वायव्यकडे २० किलोमीटर प्रतितास वेगाने सरकत आहे. हे कमी दाब क्षेत्र पश्चिम बंगालमधील बंकुरा येथे पुरुलियापासून ७० किलोमीवर अंतरावर आहे. तर राचीपासून १८० किलोमीटरवर आहे. ही स्थिती पूर्व वायव्येकडे झारखंडच्या दिशेन सरकण्याची शक्यता असून पुढील १२ तासांमध्ये कमी दाब क्षेत्रात रुपांतर होण्याचा अंदाज आहे. तर पुढील २४ तासांमध्ये ही स्थिती ठळक कमी दाब क्षेत्रात रुपांतरीत होईल, असा अंदाज हवामान विभागाने व्यक्त केला.

माॅन्सूनचा आस असलेला कमी दाबाचा पट्टा उत्तर प्रदेशातील गोरखपूर, गया, बंकुरा आणि उत्तर पश्चिम बंगाल भागात आहे. हा पट्टा बंगालच्या उपसागराच्या ईशान्य भागात समुद्रपाटीपासून ३.१ किलोमीटर उंचीवर आहे. त्यामुळे देशाच्या अनेक भागात पावसाचा अंदाज आहे.

कोकण, मध्य महाराष्ट्राचा काही भाग, खानदेश, मराठवाड्याचा काही भाग विदर्भात ठिकठिकाणी पावसाचा अंदाज दिला. मध्य महाराष्ट्रातील पुणे आणि सातारा जिल्ह्यातील घाट माथ्यावर जोरदार ते अतिजोरदार पावसाचा ऑरेंज अलर्ट देण्यात आला. तर विदर्भातील चंद्रपूर, गडचिरोली आणि गोंदीया जिल्ह्यांमध्येही काही ठिकाणी जोरदार ते अतिजोरदार पावसाचा अंदाज आहे.

विदर्भाचा उर्वरित भाग, कोकण आणि नाशिक, धुळे तसेच जळगाव जिल्ह्यात काही ठिकाणी जोरदार पावसाचा येलो अलर्ट हवामान विभागाने दिला. तर मराठवड्यातील जालाना, परभणी, हिंगोली, लातूर आणि नांदेड या जिल्ह्यांमध्येही काही ठिकाणी जोरदार पाऊस पडेल. तर मराठवाडा आणि मद्य महाराष्ट्राच्या इतर भागांमध्ये हलक्या ते मध्यम स्वरुपाच्या सरी पडतील, असा अंदाज हवामान विभागाने दिला.