Turmeric Price: हळदीचे दर दबावात

Sangli News: वायदे बाजारात हळदीचे दर दररोज कमी होत आहेत. यामुळे गेल्या महिनाभरात हळदीचे दर प्रतिक्विंटल ३०० ते ४०० रुपयांनी कमी झाले आहेत. त्यातच पावसामुळे हळदीचा उठावही कमी झाला आहे. मराठवाडा, विदर्भ, इरोड, कडपा, दुग्गीराला या भागांतील शेतकऱ्यांकडे अंदाजे चार ते पाच लाख पोती विक्रीची बाकी आहेत. सद्यःस्थितीत हळदीच्या दरात फारशी तेजी मंदी येण्याची चिन्हे नसल्याचा अंदाज हळद उद्योगातील जाणकरांनी व्यक्त केला आहे.

देशात गत हंगामात २ लाख ९० हजार ९३९ हेक्टरवर लागवड झाली असून ११ लाख १६ हजार १२४ टन हळदीचे उत्पादन झाले असल्याचे मसाला बोर्डाने त्यांच्या अहवालातून स्पष्ट केले आहे. २०२३-२४ पेक्षा गतवर्षीच्या हंगामात हळदीच्या उत्पादनात ५२ हजार ९०० टनांनी उत्पादन वाढले आहे. वास्तविक, तमिळनाडू, तेलंगणा, मध्य प्रदेश, आंध्र प्रदेश या राज्यात गत हंगामात हळदीच्या क्षेत्रात वाढ झाली. तर इतर राज्यात हळदीच्या क्षेत्रात घट झाली. त्यामुळे हळदीचे उत्पादन वाढले.

देशभरातील हळद उत्पादन घेणाऱ्या राज्यातील हळद विक्रीचा हंगाम आटोपला आहे. जूनच्या आधीपासूनच पाऊस सुरू झाला आहे. त्यामुळे बाजारपेठेत हळदीची आवक मंदावली असून अपेक्षित उठावही होत नाही. त्यातच वायदेबाजारात दररोज हळदीचे दर कमी होत असल्याचे चित्र आहे. त्यामुळे हळद दरात मंदी आली आहे. सद्यःस्थितीत मराठवाडा, विदर्भ, इरोड, कडपा, दुग्गीराला या भागातील शेतकऱ्यांकडे अंदाजे चार ते पाच लाख पोती (एक पोते ५० किलोचे) विक्रीची बाकी आहेत. शेतकरी हळद दरात वाढ होण्याची प्रतीक्षा करत आहेत.

पंधरा-वीस दिवसांनंतर मागणी वाढण्याची शक्यता

बाजारत हळदीची मागणी आणि उठाव नसल्याने शेतकरी हळद विक्रीसाठी पुढे येत नाहीत. एकंदर बाजारपेठेतील हळदीची स्थिती पाहता, सद्यःस्थितीत हळदीच्या दरात तेजीची शक्यता नसल्याचेही व्यापाऱ्यांनी सांगितले आहे. पंधरा ते वीस दिवसांनंतर बाजार पेठेत हळदीच्या मागणीत किंचित वाढ होण्याची शक्यता आहे. त्यानंतर दरात तेजी मंदी होईल, असा अंदाजही हळद व्यापाऱ्यांनी व्यक्त केला आहे.

हळदीचे दर (प्रतिक्विंटल)

राजापुरी : १४,५००

नांदेड : ११,५०० ते १३००

जळगाव : ११,५०० ते १४००

गठ्ठा : १०,५०० ते १२,०००