Turmeric Rate: हिंगोलीत हळद दरात घट

Hingoli News: हिंगोली कृषी उत्पन्न बाजार समितीअंतर्गत संत नामदेव हळद मार्केटमधील हळद दरात घट झाली आहे. कमाल दर १३ हजार रुपयांपेक्षा कमी तर किमान दर ११ हजार रुपयांपेक्षा कमी झाले आहेत. शुक्रवारी (ता. १८) हळदीची २१९५ क्विंटल आवक असताना प्रतिक्विंटल किमान १०,१०० ते कमाल १२,६०० रुपये, तर सरासरी ११,३५० रुपये दर मिळाले.

२ जुलैपर्यंत हळदीला कमाल १३ हजार रुपयापर्यंत दर मिळाले. परंतु त्यानंतर दरात ४०० ते ५०० रुपयांची घट झाली आहे. किमान १५ हजार रुपये दर मिळतील या अपेक्षेने हळद साठवूण ठेवलेल्या शेतकऱ्यांची चिंता वाढली आहे.

मागील आठवड्यात संत नामदेव हळद मार्केटमधील हळदीच्या आवकेत वाढ झाली. शुक्रवार (ता. ११) ते शुक्रवार (ता. १८) या कालावधीत हळदीची प्रतिदिन १८५० ते २४०० क्विंटलनुसार एकूण १२ हजार ४०६ क्विंटल आवक झाली. त्या वेळी प्रतिक्विंटल १०,००० ते १२,७५५ रुपये दर मिळाले.

हरभरा, सोयाबीन दरात सुधारणा

हिंगोली कृषी उत्पन्न बाजार समितीअंतर्गत धान्य बाजारात हरभरा दरात ५०० ते ६०० रुपयांनी तर सोयाबीनच्या दरात १५० रुपयांनी सुधारणा झाली. शुक्रवारी (ता. १८) हरभऱ्याची १५० क्विंटल आवक होऊन प्रतिक्विंटल किमान ५,६९० ते कमाल ६,१७५ रुपये, तर सरासरी ५,९३२ रुपये दर मिळाले.

सोयाबीनची ९०० क्विंटल आवक होऊन प्रतिक्विंटल किमान ४,०५० ते कमाल ४,४०० रुपये, तर सरासरी ४,२२५ रुपये दर मिळाले. ज्वारीची २५ क्विंटल आवक होऊन प्रतिक्विंटल किमान १,३०० ते कमाल २,१०० रुपये तर सरासरी १,७०० रुपये दर मिळाले. गव्हाची ३० क्विंटल आवक होऊन प्रतिक्विंटल २,४५० ते २,८४५ रुपये दर मिळाले.

संत नामदेव हळद मार्केट हळद दर स्थिती

(आवक क्विंटलमध्ये, दर रुपयांत)

तारीख आवक किमान कमाल सरासरी दर

११ जुलै २,४०० १०,६४० १२,६४० ११,६४०

१४ जुलै २,२०० १०,७५५ १२,७५५ ११,७५५

१५ जुलै १,८६१ १०,००० १२,५०० ११,२५०

१६ जुलै १,९०० १०,००० १२,५०० ११,२५०

१७ जुलै १,८५० १०,५०० १२,७०० ११,६००