Nagpur News: बाबा रामदेव यांच्या पतंजली उद्योगाद्वारे संचालित बहूप्रतीक्षित फूड पार्कचे उद्घाटन रविवारी (ता. ९) होणार आहे. या प्रकल्पात नागपुरी संत्रा फळांवर प्रक्रिया केली जाईल. त्याकरिता नव अनंत शेतकरी कंपनीच्या माध्यमातून फळांची पहिली गाडी सोमवारी (ता.३) रवाना करण्यात आली. प्रक्रियेमुळे हंगामात संत्रा फळांना चांगला दर मिळेल, अशी अपेक्षा व्यक्त केली जात आहे.
राज्यातील दीड लाख पैकी सव्वा लाख हेक्टर संत्रा लागवड ही विदर्भात आहे. यातून उत्पादित होणाऱ्या एकूण फळांपैकी काही टन माल हा लहान आकाराचा राहतो. या फळांना बाजारात मागणी नसल्याने एकतर अशी फळे व्यापाऱ्यांना तशीच दिली जातात. काही शेतकरी शेताच्या बांधावर किंवा रस्त्यावर ही फळे फेकून देतात. त्यामुळेच अशा फळांवर प्रक्रिया झाल्यास लहान आकाराच्या फळांना मागणी वाढत चांगला परतावा संत्रा बागायतदारांना मिळणार होता.
केंद्रीय मंत्री नितीन गडकरी यांनी ही बाब गांभीर्याने घेत बाबा रामदेव यांच्याकडे मिहान येथे फूड पार्क उभारणीसाठी पाठपुरावा केला. या प्रकल्पाकरिता स्वस्त दरात जमीन उपलब्ध करून देणार असल्याचेही त्यांना सांगण्यात आले. त्यानुसार बाबा रामदेव यांना २३३ एकर जमीन अत्यल्प दरात उपलब्ध करून देण्यात आली. आठ वर्षांपूर्वी या प्रकल्पाचे भूमिपूजन झाले. परंतु त्यानंतर हा प्रकल्प पुढे सरकलाच नाही.
परिणामी, स्वस्तातील जागेसाठी बाबा रामदेव यांनी हा घाट घातल्याची चर्चा रंगली होती. विरोधकांकडून देखील तसाच आरोप होत होता. त्यानंतर टप्प्याटप्प्याने बाबा रामदेव यांच्या पतंजली समूहाने या प्रकल्पस्थळी यंत्रणा उभारण्यास सुरुवात केली. त्यानंतर आता रविवारच्या (ता. ९) मुहूर्तावर केंद्रीय मंत्री नितीन गडकरी, मुख्यमंत्री देवेंद्र फडणवीस यांच्या हस्ते या प्रकल्पाचे उद्घाटन होणार आहे.
या प्रकल्पात संत्रा फळांवर ही प्रक्रिया होणार आहे. त्यानुसार प्रक्रियेकामी सोमवारी संत्रा फळांची पहिली गाडी रवाना करण्यात आली. या वेळी आमदार डॉ. आशिष देशमुख यांनी गाडीला हिरवी झेंडी दाखविली. या प्रसंगी कंपनीचे संचालक राकेश मानकर, प्रवीण लोहे, मनोज जवंजाळ, स्वप्नील धोटे, अपूर्व जवंजाळ, कृषी सहायक अंकुश कंकाळे, राजेश यावलकर, सुनील श्रीखंडे, विष्णू ढाले, अमित श्रोते, निखील मेश्राम, भूषण मानकर, चेतन घाटोळे आदी उपस्थित होते.
चुरी संत्र्याला १८ रुपयांचा दर
बाबा रामदेव यांच्या प्रकल्पासाठी सोमवारी (ता. ३) संत्रा फळांची पहिली गाडी रवाना झाली. म्हसेपठार येथील नव अनंत शेतकरी कंपनीच्या माध्यमातून दहा टन संत्रा पाठविण्यात आला. या लहान आकाराच्या (चुरी) संत्र्याला १८ रुपये प्रति किलो असा दर मिळाला. त्यामुळे निश्चितच येत्या काळात संत्रा बागायतदारांना अच्छे दिन येतील, अशी अपेक्षा व्यक्त केली जात आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.