Agrowon Podcast: कांदा दर दबावातच; बाजरीचे दर स्थिर, ढोबळी मिरची तेजीत, पपई दर टिकून तर काकडीला उठाव

Market Bulletin:

कांद्यावरील दबाव कायम

देशात कांद्याचे दर दबावातच आहेत. महाराष्ट्र, मध्य प्रदेश, कर्नाटक, आंध्र प्रदेशात कांद्याची आवक सुरु आहे. तर दुसरीकडे निर्यात धिम्या गतीने सुरु आहे. याचा परिणाम कांद्याच्या बाजारावर दिसून येत आहे. कांद्याच्या दरावर मागील दोन आठवड्यांमध्ये दबाव कायम दिसला. कांद्याच्या दरात काहीसे चढ उतारही दिसत आहेत. सध्या कांदा बाजारात ११०० ते १३०० रुपयांच्या दरम्यान विकला जात आहे. कांद्याची बाजारातील आवक पुढील काही आठवडे कायम राहण्याची शक्यता आहे. त्यामुळे कांद्याच्या दरातील चढ उतारही कायम राहू शकतात, असा अंदाज कांदा बाजारातील अभ्यासकांनी व्यक्त केला.

बाजरीचे दर स्थिर

देशातील बाजारात मागील काही महिन्यांपासून बाजरीचे दर स्थिर आहेत. बाजरीचे उत्पादन चालू वर्षी तीनही हंगाममात वाढल्याचे एकूण अंदाजावरून दिसत आहे. त्यामुळे बाजारातील बाजरीची आवक चांगली आहे. बाजरीला सध्या बाजारात सरासरी २ हजार ४०० ते २ हजार ७०० रुपयांच्या दरम्यान गुणवत्तेनुसार दर मिळत आहे. बाजरीची बाजारातील आवक कमी आहे. बाजारीला उठावही चांगला आहे. पुढील २ महिन्यात खरिपातील बाजरीची बाजारात आवक सुरु होईल. त्यामुळे पुरवठा पुन्हा वाढणार आहे. परिणामी बाजाराचे दर खरिपातील आवक सुरु होईपर्यंत स्थिर दिसू शकतात, असा अंदाज व्यापारी आणि जाणकारांनी व्यक्त केला.

ढोबळी मिरची तेजीत

बाजारतील सर्वच भाजीपाल्याची आवक कमीच आहे. त्यामुळे भाजीपाल्याच्या दरात सुधारणा झाली आहे. याचा लाभ ढोबळी मिरचीलाही मिळत आहे. ढोबळी मिरचीची बाजारातील आवकही कमी झाली आहे. तर ढोबळी मिरचीला चांगला उठाव आहे. त्यामुळे दरात सुधारणा दिसून आली. ढोबळी मिरचीला सध्या बाजारात सरासरी गुणवत्तेप्रमाणे ३ हजार ५०० ते ४ हजार रुपयांच्या दरम्यान भाव मिळत आहे. ढोबळी मिरचीची बाजारातील आवक पुढील काही आठवडे कमीच राहण्याची शक्यता आहे. त्यामुळे ढोबळी मिरचीचे दरही तेजीतच राहतील, असा अंदाज व्यापारी आणि अभ्यासक शेतकरी व्यक्त करत आहेत.

पपई दर टिकून

पपईला मागणी असतानाच बाजारातील आवक मात्र कमी आहे. त्यामुळे पपईच्या दरात मागील दोन आठवड्यांमध्ये सुधारणा झाली होती. पपईचे हे दर टिकून आहेत. सध्या राज्यात पपईचे उत्पादन कमी आहे. त्यातही दर्जेदार पपईची टंचाई भासत आहे. राज्यातील बाजारातही पपईची मागणी आहे. उत्तर भारतातूनही मागणी आहे. त्यामुळे शेतकऱ्यांना जागेवर सध्या १६०० ते १८०० रुपये प्रतिक्विंटलचा दर मिळत आहे. श्रावणमास व अन्य कारणांमुळे पपईला मागणी आहे. दुसरीकडे बाजारात पपईची आवक कमी आहे. त्यामुळे पुढील काही आठवडे दर स्थिर राहू शकतात, असा अंदाज पपई बाजारातील व्यापाऱ्यांनी व्यक्त केला.

काकडीला उठाव

काकडीची बाजारातील आवक कमी झाली आहे. अनेक बाजारातील आवक १०० क्विंटलपेक्षाही कमी झाली. केवळ पुणे, मुंबई, नाशिक, नागपूर अशा बाजारांमधील आवक जास्त आहे. तर दुसरीकडे काकडीला उठावही चांगला आहे. त्यामुळे काकडीचे दर टिकून आहेत. राज्यातील बहुतांशी बाजारांमध्ये काकडीला सरासरी २ हजार ते २ हजार ५०० रुपयांच्या दरम्यान भाव मिळत आहे. तर आवक कमी असलेल्या मोठ्या बाजारांमध्ये सरासरी दर ३ हजारांपर्यंतही आहे. काकडीची आवक आणखी काही आठवडे कमी राहण्याची शक्यता आहे. त्यामुळे दरही टिकून राहतील, असा अंदाज व्यापारी व्यक्त करत आहेत.