Early Papaya Cultivation : खानदेशात अर्ली पपईची दोन हजार हेक्टरवर लागवड

अॅग्रोवन वृत्तसेवा

Jalgaon News : जळगाव ः खानदेशात आगाप किंवा अर्ली पपई लागवड पूर्ण होत आली आहे. उष्णता वाढताच किंवा कमाल तापमान ३५ ते ३६ अंश सेल्सिअसपर्यंत पोहोचल्यानंतर नियमित किंवा हंगामी लागवड सुरू होईल, त्याबाबतचे नियोजन अनेकांनी केले आहे.

१५ नंबर वाणाच्या पपईची लागवड खानदेशात नोव्हेंबर, डिसेंबरमध्ये सुरू झाली. ७८६ पपई वाणाची लागवड अधिक उष्णतेत केली जाते. ही लागवड फेब्रुवारी, मार्चमध्ये सुरू होते. सध्या कमाल तापमान ३५ अंश सेल्सिअसपर्यंत पोहोचलेले नाही. थंडी असते. पहाटेपर्यंत गारठा असतो. दुपारी १२ ते चार यादरम्यान ऊन तापते. परंतु कमाल तापमान या वाणाच्या लागवडीसाठी योग्य नाही, असे शेतकऱ्यांचे म्हणणे असून, ही लागवड सुरू झालेली नाही. परंतु पुढील महिन्यात ही लागवड सुरू होईल, असे संकेत आहेत.

खानदेशात यंदा पपईची लागवड कमी होईल, असे दिसत आहे. कारण डिसेंबरमध्ये पपई दर परवडले नाहीत. या काळात सरासरी पाच रुपये प्रतिकिलोचा दर होता. दरांसाठी शेतकऱ्यांनी पपईची काढणी बंद केली होती. धुळ्यातील शिरपूर, नंदुरबारमधील शहादा भागातही नाराजी आहे. अनेकांची पपई

शेतातच पपई पिकून खराब झाली. यात शेतकऱ्यांचे नुकसान झाले. खरेदीदारांनी मनमानी केली. यात अनेकांनी पपई लागवड नव्या हंगामात कमी करण्याचे नियोजन केले आहे. तर काहींनी लागवड टाळण्याचा निर्णय घेतला आहे.

खानदेशात मागील हंगामात सुमारे सात हजार हेक्टरवर पपई पीक होते. नंदुरबारमध्ये सा़डेचार हजार हेक्टरवर पपई पीक होते. नंदुरबारमधील एकट्या शहादा तालुक्यात चार हजार हेक्टरवर पपई होती. या भागात पपई पीक कमी दर व विषाणूच्या समस्येने काढावे लागले. यामुळे नंदुरबारमधील लागवडीत मोठी घट येईल, असे दिसत आहे.

लागवडीत घट होणार

आजघडीला खानदेशात सुमारे दोन हजार हेक्टरवर पपईची लागवड झाली आहे. ही लागवड जळगाव व धुळे जिल्ह्यात अधिक आहे. या भागात १५ नंबर पपईस पसंती मिळाली आहे. नंदुरबारमधील लागवडीने वेग घेतलेला नाही. परंतु पुढील महिन्याच्या दुसऱ्या पंधरवड्यात लागवडीस वेग येईल, असे दिसत आहे. नंदुरबारमधील लागवड कमी होईल, असे संकेत यंदाही आहेत.