Agrowon Podcast: गव्हाचा बाजार स्थिरावला, ढोबळी मिरची-टोमॅटो तेजीत; भेंडी व हळद दर टिकून

थोडक्यात माहिती...

• गव्हाचे दर २४००-२७०० रुपयांच्या दरम्यान स्थिर आहेत.

• ढोबळी मिरचीला ४ हजारांपर्यंत दर मिळत असून दर तेजीत आहेत.

• टोमॅटो दरात २२०० पर्यंत सुधारणा; आवक कमी राहणार.

• भेंडीचे दर टिकून असून सरासरी दर २५०० ते ३३००.

• हळदीचे बाजार स्थिर; सणांच्या मागणीची प्रतीक्षा.

गव्हाचे दर स्थिरावले

गव्हाचा बाजार मागील काही आठवड्यांपासून एका भावपातळीवर स्थिर दिसत आहे. यंदा देशातील उत्पादन वाढल्याचा सरकारचा अंदाज आहे. तसेच सरकारची खरेदी ३०० लाख टनांच्या पुढे गेली. सरकार गव्हाच्या दराविषयी संवेदनशील आहे. दरवाढ रोखण्यासाठी सरकारने स्टाॅक लिमिट लावले आहे. यामुळे दर २ हजार ४०० ते २ हजार ७०० रुपयांच्या दरम्यान सरासरी दर मिळत आहे. काही बाजारातील दर ३ हजारांवरदेखील पोचले आहेत. मात्र बाजारातील आवक आणि मागणी पाहता दर पुढील काही आठवडे याच पातळीदरम्यान राहू शकतात, असा अंदाज गहू बाजारातील अभ्यासकांनी व्यक्त केला. 

ढोबळी मिरची तेजीत 

बाजारतील सर्वच भाजीपाल्याची आवक कमीच आहे. त्यामुळे भाजीपाल्याच्या दरात सुधारणा झाली आहे. याचा लाभ ढोबळी मिरचीलाही मिळत आहे. ढोबळी मिरचीची बाजारातील आवकही कमी झाली आहे. तर ढोबळी मिरचीला चांगला उठाव आहे. त्यामुळे दरात सुधारणा दिसून आली. ढोबळी मिरचीला सध्या बाजारात सरासरी गुणवत्तेप्रमाणे ३ हजार ५०० ते ४ हजार रुपयांच्या दरम्यान भाव मिळत आहे. ढोबळी मिरचीची बाजारातील आवक पुढील काही आठवडे कमीच राहण्याची शक्यता आहे. त्यामुळे ढोबळी मिरचीचे दरही तेजीतच राहतील, असा अंदाज व्यापारी आणि अभ्यासक शेतकरी व्यक्त करत आहेत. 

टोमॅटो दरात सुधारणा

बाजारातील टोमॅटोची आवक कमी झाली होत आहे. त्यामुळे दरातही सुधारणा दिसून येत आहे. टोमॅटोला सध्या उठाव कायम आहे. मात्र बाजारातील आवक कमी आहे. तोड्याच्या स्थितीतील टोमॅटोच्या लागवडी या काळात कमी असतात. यंदा मे महिन्यापासूनच पावसाने पिकाला दणका दिला आहे. यामुळे दरात सुधारणा दिसून येत आहे. सध्या टोमॅटोला सरासरी १५०० ते २ हजार रुपयांच्या दरम्यान दर मिळत आहे. कमाल दर अनेक बाजारात २२०० रुपयांच्या दरम्यान पोचले आहेत. टोमॅटोची बाजारातील आवक पुढील काळात आणखी कमी होण्याची शक्यता आहे. त्यामुळे दरात सुधारणा अपेक्षित आहे, असे टोमॅटो बाजारातील अभ्यासकांनी सांगितले. 

भेंडीचे दर टिकून 

भेंडीचे दर मागील २ आठवड्यांपासून बाजारात टिकून आहेत. पावसाचा फटका भेंडी पिकाला बसत आहे. परिणामी बाजारातील आवक मर्यादीत आहे. राज्यातील बहुतांशी बाजारांमधील भेंडीची आवक ५० क्विंटलपेक्षाही कमी आहे. केवळ पुणे, मुंबई, नाशिक, नागपूर आणि अमरावती अशा बाजारांमध्ये आवक काहीशी अधिक दिसत आहे. त्यामुळे सध्या भेंडीला २ हजार ५०० ते ३ हजार रुपये दर मिळत आहे. काही बाजारांमध्ये उचांकी अधिक आहे. मुंबई बाजारात सरासरी ३ हजार ३०० रुपये दर मिळत आहे. बाजारातील भेंडीची आवक काही आठवडे मर्यादीतच राहण्याची शक्यता आहे. त्यामुळे दरही टिकून राहू शकतात, असा अंदाज भेंडी बाजारातील व्यापारी व्यक्त करत आहेत. 

हळदीचे बाजार स्थिर

देशातील  बाजारात सध्या हळदीला मर्यादीत उठाव दिसत आहे. सणांची मागणी अद्याप आली नाही, असे व्यापारी सांगत आहेत. बाजारातील हळदीची आवकही कमीच आहे. त्यामुळे हळदीच्या दरात काहीसे चढ उतार सुरु आहेत. सध्या देशातील बाजारात हळदीला सरासरी १२ हजार ते १४ हजार रुपयांच्या दरम्यान दर मिळत आहे. तर राज्यातील बाजारात हळद ११ हजार ते १३ हजाराने विकली जात आहे. सध्या वसमत, हिंगोली, नांदेड आणि रिसोड बाजारात हळदीची चांगली आवक दिसत आहे. पुढील महिन्यापासून हळदीला चांगला उठाव येऊ शकतो. त्यामुळे हळदीच्या दरालाही आधार मिळेल, असा अंदाज हळद बाजारातील आभ्यासकांनी व्यक्त केला.

वारंवार विचारले जाणारे प्रश्न (FAQs):

१. गव्हाचे सध्याचे बाजारभाव काय आहेत?
सध्या गव्हाचे दर २४०० ते २७०० रुपयांदरम्यान आहेत.

२. मिरचीच्या दरात इतकी वाढ का झाली आहे?
मिरचीची आवक कमी व मागणी अधिक असल्यामुळे दर वाढले.

३. टोमॅटोचे दर अजून वाढतील का?
होय, पुढील काळात आवक आणखी कमी होण्याची शक्यता आहे.

४. हळदीला कधी चांगला उठाव मिळेल?
पुढील महिन्यांपासून सणांमुळे हळदीला उठाव येईल.

५. भेंडीचे दर किती काळ टिकतील?
मर्यादीत आवकेमुळे भेंडीचे दर काही आठवडे टिकतील, असा अंदाज आहे.