Agrowon Podcast: तुरीच्या भावातील मंदी कायम; कांदा-गहू स्थिर, काकडी-दोडक्याला चांगली मागणी

Market Bulletin:

कांद्याचे दर स्थिर

देशातील बाजारात कांद्याची आवक चांगली आहे. मागणीच्या तुलनेत पुरवठा होत असल्याने कांद्याचे भावही मागणी ५ दिवसांपासून काहिसे स्थिर आहेत. लासलगाव बाजारात आज कांद्याला सरासरी १५०० रुपये दर मिळाला. तर कमाल भाव २१०१ रुपये होता. पुणे बाजारातही सरासरी दर १३०० रुपये कर चांगल्या कांद्याला २ हजार रुपये भाव होता. कांद्याची बाजारातील आवक पुढील काळात काहीशी कमी होत जाण्याची शक्यता आहे. त्यामुळे दरातही काहीसे चढ उतार दिसू शकतात. कांद्याची उपलब्धता चांगली असल्याने पुढील दोन आठवडे मागील वर्षीप्रमाणे तेजी दिसण्याची शक्यता कमीच आहे, असे कांदा बाजारातील अभ्यासकांनी सांगितले. 

काकडीला उठाव

राज्यातील बाजारात मागील काही आठवड्यापासून काकडीची आवक कमी होत आहे. तर दुसरीकडे काकडीला उठावही मिळत आहे. पाऊस आणि बदलत्या वातावरणामुळे काकडीच्या उत्पादनावर परिणाम होत असल्याचे शेतकऱ्यांनी सांगितले. बाजारातील आवक मर्यादीत असल्याने सध्या काकडी १८०० ते २ हजार रुपये प्रतिक्विंटलने विकली जात आहे. बाजारातील काकडीची आवक पुढील काही आठवडे कमीच राहण्याची शक्यता आहे. त्यामुळे काकडीचे दरही टिकून राहू शकतात, असा अंदाज व्यापाऱ्यांनी व्यक्त केला. 

दोडक्याला मागणी

बाजारीत दोडक्याची आवक मोठ्या प्रमाणात कमी झाली. तर दोडक्याला चांगला उठाव आहे. त्यामुळे दोडक्याच्या भावातही सुधारणा दिसून आली. दोडका पिकालाही सततचा पाऊस आणि ढगाळ हवामानाचा फटका बसत आहे. पिकाचे मोठे नुकसान झाल्याचे शेतकरी सांगत आहेत. आवक कमी आणि चांगली मागणी यामुळे दोडक्याचा बाजार ४ हजार ते ५ हजार रुपये प्रतिक्विंटलच्या दरम्यान पोचला. दोडक्याची आवक आणखी काही आठवडे कमीच राहण्याची शक्यता आहे. त्यामुळे दरही टिकून राहतील, असा अंदाज व्यापारी व्यक्त करत आहेत. 

गव्हाचे दर स्थिर

देशातील बाजारात नव्या मालाची आवक आणि सरकारने लादलेले स्टाॅक लिमिट यामुळे गव्हाचे भाव स्थिरावले आहेत. बाजारातील गव्हाची आवकही कमी होत आहे. गव्हाचे भाव मागील महिनाभरात जवळपास २०० रुपयांनी कमी झाले आहेत. सध्या गहू २ हजार २०० ते २ हजार ५०० रुपयांच्या दरम्यान विकला जात आहे. पुढील काळात गव्हाची आवक कमी होणार आहे. मात्र पुढील महिनाभरानंतर सणांची मागणी सुरु होईल. त्यामुळे गव्हाला उठाव राही. या परिस्थितीत गव्हाच्या दरात सुधारणा होऊ शकते, असा अंदाज गहू बाजारातील अभ्यासकांनी व्यक्त केला. 

तुरीचा भाव दबावातच

तुरीच्या बाजारातील मंदी कायम आहे. वाढत्या आयातीमुळे देशात तुरीची उपलब्धता चांगली आहे. तसेच सरकारने मार्च २०२६ पर्यंत तुरीची आयात खुली ठेवलेली. यामुळे आयात कायम राहणार आहे. याचा दबाव दरावर येत आहे. सध्या बाजारात तूर प्रतिक्विंटल सरासरी ६ हजार ५०० ते ६ हजार ९०० रुपयांच्या दरम्यान विकली जात आहे. देशात उपलब्धता चांगली असल्याने मागणीही गरजेप्रमाणे येत आहे. त्यामुळे पुढील महीनाभरतरी तुरीच्या भावात मोठी वाढ होण्याची शक्यता कमीच आहे. सणांची मागणी आल्यानंतर सुधारणा होऊ शकते, असा अंदाज अभ्यासकांनी व्यक्त केला.