Agrowon Podcast : सोयाबीनचे दर टिकून; आजचे ज्वारी बाजार, ज्वारी दर, बेदाणा भाव, ढोबळी मिरची रेट

सोयाबीन दरात सुधारणा

देशातील बाजारात मागील दोन आठवड्यांपासून सोयाबीनच्या दरात सुधारणा दिसून आली. देशात यंदा सोयाबीनची लागवड कमी आहे. त्यातच उत्पादनाला यंदा फटका बसू शकतो. तसेच उद्योगाकडे स्टाॅक नसल्याने खरेदी करत आहेत. सोयातेल आणि सोयापेंडच्या दरातही सुधारणा दिसून आली.

त्यामुळे सोयाबीनच्या भावात मागील आठवडाभरात क्विंटलमागे ३०० रुपयांची सुधारणा झाली. प्रक्रिया प्लांट्सचे भाव ४ हजार ७०० ते ४ हजार ८०० रुपयांच्या दरम्यान आहेत. तर बाजार समित्यांमध्ये सोयाबीनला सरासरी ४ हजार २०० ते ४ हजार ५०० रुपयांचा दर मिळत आहे. सोयाबीनच्या दरात यापुढील काळातही काहीसे चढ उतार दिसू शकतात, असा अंदाज सोयाबीन बाजारातील अभ्यासकांनी व्यक्त केला.

ज्वारीला मागणी कायम

अलीकडच्या काही वर्षांपासून गावरान ज्वारीची मागणी वाढत आहे. मात्र मागणी वाढूनही ज्वारीच्या दरात सुधारणा होत नसल्याची बाजारातील स्थिती आहे. सध्या राज्यात ज्वारी गुणवत्तेनुसार २ हजार ५०० ते ४ हजारांच्या दरम्यान विकली जात आहे. ज्वारी उत्पादनात अहिल्यानगर, धाराशिव, बीड, सोलापूरसह काही जिल्हे आघाडीवर असतात.

ज्वारीचे उत्पादन वाढत आहे. मात्र, सध्या बाजारातील आवक कमी आहे. गेल्या काही दिवसांचा विचार करता ज्वारीला मागणी असूनही फारसा दर मिळत नाही. बाजारातही ज्वारीचा दर्जा चांगला असल्याचे सांगत व्यापाऱ्यांकडूनही हमी दरापेक्षा कमी दराने ज्वारीची खरेदी केली जात आहे. ज्वारीचे दर काही आठवडे कायम राहू शकतात, असा अंदाज ज्वारी बाजारातील अभ्यासकांनी व्यक्त केला.

बेदाणा आवक कमीच

देशात यंदा बेदाण्याचे उत्पादन कमी झाले. त्यामुळे हंगामाच्या सुरुवातीपासूनच बेदाणा दर गेल्यावर्षीपेक्षा अधिक आहेत. बेदाण्याला यंदा मागणीही चांगली राहीली. याचाही आधार दराला मिळाला. सध्या राज्यातील मोठ्या बाजारांमध्ये बेदाणा २५० ते ३५० रुपये प्रतिकिलोने विकला जात आहे.

तर शेतकऱ्यांना मिळणारा दर २२० ते २७० रुपयांच्या दरम्यान आहे. सध्या बेदाण्याला सणांची मागणी येत आहे. त्यामुळे उठावही चांगला मिळत आहे. बेदाण्याची मागणी पुढील काही महीने चांगली राहण्याची शक्यता आहे. त्यामुळे बेदण्याचे दरही टिकून राहतील, असा अंदाज व्यापारी आणि अभ्यासकांनी व्यक्त केला.

ढोबळी मिरची तेजीत

बाजारतील सर्वच भाजीपाल्याची आवक कमीच आहे. त्यामुळे भाजीपाल्याच्या दरात सुधारणा झाली आहे. याचा लाभ ढोबळी मिरचीलाही मिळत आहे. ढोबळी मिरचीची बाजारातील आवकही कमी झाली आहे. तर ढोबळी मिरचीला चांगला उठाव आहे. त्यामुळे दरात सुधारणा दिसून आली.

ढोबळी मिरचीला सध्या बाजारात सरासरी गुणवत्तेप्रमाणे ३ हजार ५०० ते ४ हजार रुपयांच्या दरम्यान भाव मिळत आहे. ढोबळी मिरचीची बाजारातील आवक पुढील काही आठवडे कमीच राहण्याची शक्यता आहे. त्यामुळे ढोबळी मिरचीचे दरही तेजीतच राहतील, असा अंदाज व्यापारी आणि अभ्यासक शेतकरी व्यक्त करत आहेत.

कोथिंबीरचे दर स्थिर

राज्यातील बाजारात कोथिंबरची आवक काहीशी वाढलेल दिसत आहे. मात्र बाजारात कोथिंंबीरला चांगला उठाव मिळत आहे. यामुळे दरही टिकून आहेत. सध्या राज्यातील मोठ्या बाजारांमध्ये कोथिंबरची आवक काहीशी वाढलेली आहे. त्यामुळे प्रतिक्विंटल सरासरी १५०० ते २ हजार रुपये दर मिळत आहे.

तर प्रतिजुडी ४ रुपये ते ५ रुपयांचा भाव मिळत आहे. पुढील काही आठवड्यांनंतर बाजारातील कोथिंबीरची आवक वाढण्याचा अंदाज आहे. मात्र पुढील २ ते ३ आठवडे बाजारातील आवक स्थिर राहू शकते. त्यामुळे कोथिंबीरचे दरही टिकून राहू शकतात, असा अंदाज व्यापारी व्यक्त करत आहेत.