Raisin Price: राज्यातील बेदाण्याचे दर टिकून राहण्याचे अंदाज

Sangli News: चीनमधून भारतात बेकायदेशीरपणे बेदाणा आल्याच्या बातम्यांमुळे गेल्या आठ दिवसांत बेदाण्यांच्या दरात प्रति किलो सरासरी ३० रुपयांची घट झाली. परंतु चीनमधून आलेल्या बेदाण्याचे प्रमाण किती हे अजून स्पष्ट झालेले नाही. त्यामुळे दरातील घट तात्पुरती असून राज्यातील बेदाण्याचे दर टिकून राहतील, असा अंदाज या क्षेत्रातील जाणकारांनी व्यक्त केला. शेतकऱ्यांनी घाबरून घाईघाईने बेदाणा विक्री करू नये, तर बाजारातील दरस्थितीचा अंदाज घेऊन निर्णय घ्यावा, असे आवाहन त्यांनी केले.

राज्यातील बेदाण्याला देशांतर्गतच मोठी बाजारपेठ आहे. त्यामुळे उत्तर आणि दक्षिण भारतात बेदाण्याला मोठी मागणी असते. गतवर्षी द्राक्ष पिकावर नैसर्गिक आपत्तीचे संकट ओढावले होते. त्यामुळे बेदाण्याचे उत्पादन घटले. नुकत्याच संपलेल्या हंगामात सुमारे १ लाख ३० हजार टन बेदाण्याचे उत्पादन झाले होते. हंगामाच्या प्रारंभापासून बाजारात बेदाण्‍याची मागणी आणि उठाव यामुळे दरही चांगले मिळाले आहेत. गतवर्षीच्या तुलनेत यंदाच्या हंगामात बेदाण्याचे दर दुप्पट राहिले.

बाजारात बेदाण्याच्या मागणीपेक्षा पुरवठा कमी आहे. त्यामुळे दरात सुधारणा होत असल्याचे चित्र आहे. यंदाच्या हंगामात मार्च, एप्रिल, मे आणि जून या चारही महिन्यांत टप्प्याटप्प्याने बेदाण्याचे दर वाढले. त्यामुळे शेतकऱ्यांना मोठा दिलासा मिळाला. आज अंदाजे ५५ हजार टन बेदाणा शिल्लक आहे. त्यापैकी ६० टक्के शेतकऱ्यांकडे आहे. राज्यातील बेदाण्याची विक्री बेकरी उत्पादने आणि खाद्यपदार्थांसाठी उत्तर आणि दक्षिण भारतात होते. सण-समारंभ, दैनंदिन वापरासाठीही बेदाणा वापर जास्त आहे.