Agrowon Podcast: डाळिंबात तेजी कायम, शेवग्याला जोरदार उठाव; लसूण दर टिकून, बटाटा-उडीद बाजार स्थिर

Market Bulletin:

उडदाचे भाव स्थिर

वाढती आयात आणि देशातील बाजारातील आवक यामुळे उडदाचे भाव दबावात आहेत. सध्या उडदाला हमीभावापेक्षा कमी एक हजार ते दीड हजार रुपये कमी भाव मिळत आहे. यामुळे शेतकरी अडचणीत येत आहेत. बाजारात सध्या उडीद ६ हजार ते ६ हजार ५०० रुपयाने विकला जात आहे. बाजारातील उडदाची आवक पुढील दोन महीने कमीच राहण्याची शक्यता आहे. मात्र आयातही सुरु आहे. आयातीमुळे दर दबावात आहेत. बाजारातील ही परिस्थिती पुढील काळातही कायम राहू शकते. उडदाच्या भावात पुढील काळात काहीसे चढ उतार दिसू शकतात, असा अंदाज उडीद बाजारातील अभ्यासकांनी व्यक्त केला.

शेवग्याला चांगला उठाव

बाजारातील शेवग्याची आवक कमीच आहे. त्यामुळे शेवग्याचे भावही तेजीतच आहेत. शेवगा पिकाला यंदा पाऊस आणि बदलत्या वातावरणाचा मोठा तडाखा बसला. त्यामुळे शेवग्याची आवक कमी आणि उठाव चांगला अशी परिस्थिती आहे. त्यामुळे शेवग्याचे भाव तेजीत आहेत. शेवगा आजही ५ हजार ते ६ हजार रुपये प्रतिक्विंटलच्या दरम्यान विकला गेला. शेवग्याची बाजारातील आवक पुढील काळातही कमीच राहण्याचा अंदाज आहे. तर मागणीह टिकून राहील. त्यामुळे शेवग्याचे भाव तेजीतच राहू शकतात, असा अंदाज व्यापारी व्यक्त करत आहेत.

लसूण दर टिकून

लसणाच्या बाजारात मागील काही दिवसांपासून सुधारणा दिसून आली. बाजारतील लसणाची आवक वाढलेल्या पावासामुळे कमी झाली होती. मात्र लग्नसराई आणि समारंभामुळे लसणाला उठाव चांगला होता. त्यामुळे लसणाच्या भावात दोन आठवड्यांमध्ये सरासरी ५०० ते १ हजार रुपयांची वाढ दिसून आली. लसणाचे भाव राज्यातील बहुतांशी बाजारांमध्ये सध्या ७ हजार ते ८ हजार रुपये प्रतिक्विंटलच्या दरम्यान होते. लसणाची बाजारातील आवक पुढील काही आठवडे कायम राहू शकते. तसेच त्यानंतर आवक कमी होण्याची शक्यता आहे. त्यामुळे दरातही सुधारणा होऊ शकते, असा अंदाज व्यापारी व्यक्त करत आहेत.

बटाट्याचा बाजार स्थिरावला

देशात यंदा बटाटा उत्पादन चांगले झाले. देशातील महत्वाच्या बटाटा उत्पादक उत्तर प्रदेश आणि पश्चिम बंगालमध्ये उत्पादन वाढल्याचे शेतकरी सांगत आहेत. त्यामुळे बाजारातील बटाटा आवकही चांगली आहे. परिणामी बटाट्याचे दर दबावातच आहेत. बटाट्याला सध्या प्रतिक्विंटल सरासरी १५०० ते २ हजार रुपयांच्या दरम्यान भाव मिळत आहे. पुढील काळातही बटाटा आवक चांगली राहण्याची शक्यता आहे. त्यामुळे बटाट्याचे भावही स्थिर राहू शकतात, असा अंदाज जाणकारांनी व्यक्त केला.

डाळिंबातील तेजी कायम

डाळिंबाची बाजारातील आवक मर्यादीतच आहे. त्यामुळे डाळिंबाचे भाव तेजीत आहेत. डाळिंबाच्या भावात काहीशी चढ उतार सुरु आहेत. असे असले तरी सरासरी दरपातळी टिकून आहे. बाजारातील आवक कमी असल्याने दर तेजीत आहेत, असे व्यापारी सांगत आहेत. यंदाही उत्पादन कमीच निघाले. त्यातच गुणवत्तापूर्ण मालाची टंचाई असल्याचेही व्यापारी सांगत आहेत. सध्या डाळिंब ७ हजार ते १२ हजार रुपये प्रतिक्विंटलने विकले जात आहे. डाळिंबाची बाजारातील आवक पुढील काळातही कमीच राहण्याची शक्यता आहे. त्यामुळे डाळिंबाचे दरही टिकून राहतील, असा अंदाज डाळिंब बाजारातील अभ्यासकांनी व्यक्त केला.