Market Update: टोमॅटो स्थिर; डाळिंब, काबुली हरभरा, गवार आणि बटाट्याला काय दर?

डाळिंबाचे भाव तेजीतच

डाळिंबाला बाजारात सध्या चांगला उठाव आहे. बाजारातील कमी आवक आणि चांगला उठाव यामुळे डाळिंबाचे दर तेजीतच आहेत. बाजारातील आवक यंदा अपेक्षेप्रमाणे झालीच नाही. याचा आधार डाळिंबाला दराला मिळत आहे, असे व्यापारी सांगत आहेत. सध्या बाजारात डाळिंबाला प्रतिक्विंटल सरासरी ८ हजार ते ९ हजार रुपयांच्या दरम्यान भाव मिळत आहे. डाळिंबाला बदलत्या वातावरणाचा आणि पावसाचा तडाखा बसला. त्यामुळे माल कमी आहे. पुढील काही आठवडे बाजारातील आवक कमीच राहील, असा अंदाज डाळिंब बाजारातील व्यापारी व्यक्त करत आहेत.

टोमॅटोला उठाव

बाजारात टोमॅटोला चांगला उठाव आहे. त्यामुळे टोमॅटोचे दरही स्थिर दिसत आहेत. मागील काही दिवसांपासून आवक आणि दर स्थिर दिसत आहेत. टोमॅटोची बाजारातील आवकही सुधारली आहे. त्यामुळे टोमॅटोचे भाव राज्यातील मोठ्या बाजारांमध्ये सध्या १५०० ते २ हजार रुपये आहेत. बाजारातील टोमॅटोची आवक पुढील काळातही मर्यादीतच राहण्याची शक्यता आहे. पावसामुळे पिकाचे नुकसानही वाढते. परिणामी माल कमी मिळतो. त्यामुळे दरातही सुधारणा दिसू शकते, असा अंदाज टोमॅटो बाजारातील व्यापारी व्यक्त करत आहेत.

बटाटा दर टिकून

देशात यंदा बटाटा उत्पादन चांगले झाले. देशातील महत्वाच्या बटाटा उत्पादक उत्तर प्रदेश आणि पश्चिम बंगालमध्ये उत्पादन वाढल्याचे शेतकरी सांगत आहेत. त्यामुळे बाजारातील बटाटा आवकही चांगली आहे. परिणामी बटाट्याचे दर दबावातच आहेत. बटाट्याला सध्या प्रतिक्विंटल सरासरी १५०० ते २ हजार रुपयांच्या दरम्यान भाव मिळत आहे. पुढील काळातही बटाटा आवक चांगली राहण्याची शक्यता आहे. त्यामुळे बटाट्याचे भावही स्थिर राहू शकतात, असा अंदाज जाणकारांनी व्यक्त केला.

काबुली हरभरा तेजीत

काबुली हरभऱ्याचे दर तेजीतच आहेत. देशात यंदा काबुली हरभऱ्याचे उत्पादन कमी राहीले. तर दुसरीकडे मागणी चांगली आहे. त्यामुळे काबुली हरभऱ्याचे दर मागील काही आठवड्यांपासून तेजीत आले आहेत. बजारातील कमी आवक आणि चांगली मागणी यामुळे काबुली हरभऱ्याचे भावही टिकून आहेत. एप्रिल महिन्यापासून काबुली हरभरा ११ हजार ते १२ हजार रुपयांच्या दरम्यान विकला जात आहे. यापुढील काळात बाजारातील काबुली हरभऱ्याची आवक कमी होत जाईल. मात्र काबुली हरभऱ्याला उठाव चांगला राहील. त्यामुळे काबुली हरभऱ्याचे दरही टिकून राहतील, असा अंदाज अभ्यासकांनी व्यक्त केला.

गवार तेजीत

गवारचे भाव मागील २ आठवड्यात चांगलेच वाढले आहेत. गवारची बाजारातील आवक पावसामुळे कमी झाली आहे. गवार पिकासाठी एप्रिल आणि मे महिन्यात पोषक हवामान राहीले नाही. त्याचा फटका पिकाला आधीपासूनच बसत होता. मे महिन्यातील पावसाने पिकाचे नुकसान वाढले. त्यामुळे आवक कमी होऊन भाव तेजीत आले. गवारचे भाव बहुतांशी बाजारात सरासरी ६ हजार ते ७ हजार रुपये प्रतिक्विंटलच्या दरम्यान पोचले आहेत. गवारची आवक पुढील काळातही कमीच राहण्याची शक्यता आहे. त्यामुळे गवारचे भावही टिकून राहतील, असा अंदाज व्यापारी व्यक्त करत आहेत.