Agrowon Podcast: पपईचा बाजारभाव टिकून; तूर, कारली, कापूस तसेच काय आहे सोयाबीन भाव

Market Bulletin:

तूर बाजार दबावात

राज्यासह देशातील बाजारात सध्या तुरीची आवक वाढत आहे. राज्यात सरकारने हमीभावाने तूर खरेदीला मान्याता दिली. नोंदणीही सुरु झाली. मात्र प्रत्यक्ष खरेदी अजूनही बहुतांशी भागात सुरु झाली नाही. त्याचा काहीसा दबाव बाजारावर दिसत आहे. बाजारातील आवक वाढ असल्याने दरही स्थिर दिसत आहेत. सध्या तुरीला सरासरी ७ हजार ते ७ हजार ३०० रुपयांचा भाव दिसत आहे. बाजारातील आवक पुढच्या काळात आणखी वाढणार आहे. त्यामुळे तुरीचा बाजार काही आठवडे तरी हमीभावाच्या खाली राहू शकतो, असा अंदाज तूर बाजारातील अभ्यासकांनी व्यक्त केला.

पपईचा बाजार टिकून

राज्यातील पपईला सध्या चांगली मागणी आहे. त्यामुळे पपईच्या भावातील तेजी टिकून आहे. पपईचे वाढलेले भाव मागील काही दिवसांपासून स्थिर आहेत. वाढती उष्णता आणि सणामुळे पपईला चांगला उठाव आहे. मात्र बाजारातील पपईची आवक मर्यादीत आहे. राज्यातील पपई सध्या देशभरात जात आहे. त्यामुळे पपईला सध्या १७०० ते २ हजार रुपयांचा भाव मिळत आहे. यंदा पपईची लागवड सरासरीपेक्षा कमीच होती. त्यामुळे आवकही मर्यादीत आहे. पपईचा बाजारभाव आणखी काही आठवडे कायम राहू शकतो, असा अंदाज पपई बाजारातील अभ्यासकांनी व्यक्त केला.

कारल्याला चांगला उठाव

राज्यातील बाजारात कारल्याची आवक चांगली सुरु आहे. तर कारल्याला उठावही चांगला आहे. पण आवकेचा दबाव दरावर दिसून आला दर आपल्या उचांकी दरावरून ७०० रुपयांपर्यंत कमी झाले. मात्र दरपातळी एक महीन्यापासून टिकून आहेत. सध्या बाजारात कारली प्रतिक्विंटल २ हजार ५०० ते ३ हजार रुपयांच्या दरम्यान विकले जात आहेत. बाजारातील कारल्याची आवक पुढील काही आठवडे कायम राहण्याचा अंदाज आहे. त्यामुळे दरही स्थिर राहू शकतात, असा अंदाज शेतकरी आणि व्यापारी व्यक्त करत आहेत.

सोयाबीनमध्ये नरमाई

आंतरराष्ट्रीय बाजारात सोयाबीनच्या दरात काहीसे चढ उतार सुरु आहेत. आज सोयाबीन आणि सोयापेंडच्या भावात शुक्रवारच्या तुलनेत काहीशी वाढ झाली होती. देशात मात्र सोयाबीनचा बाजार दबावातच आहे. सोयाबीनचा भाव बाजार समित्यांमध्ये प्रतिक्विंटल ३ हजार ७०० ते ४ हजार रुपयांच्या दरम्यान आज भाव मिळाला. तर सोयापेंडचा भाव सरासरी २७ हजार ते २८ हजार रुपयांच्या दरम्यान होते. बाजारातील सोयाबीनची आवक काहीशी कमी झाली आहे. मात्र सोयाबीनच्या भावावरील दबाव काही आठवडे कायम राहतील, असा अंदाज सोयाबीन बाजारातील अभ्यासकांनी व्यक्त केला.

कापूस दबावातच

देशातील बाजारात कापसाची आवक सरासरी एक लाख गाठींच्या दरम्यान कायम आहे. बाजारातील आवक चालू महिन्यात कमी होण्याची शक्यता आहे. तसेच आता शेतकऱ्यांकडील कापसाचा स्टाॅकही कमी होत आहे. याचा परिणाम आवकेवर दिसेल. पण आंतरराष्ट्रीय बाजारातील कापसातील मंदी आणि देशातील स्थिर उठाव याचा परिणाम दरावर दिसत आहे. कापूस आज सरासरी ६ हजार ८०० ते ७ हजार २०० रुपयांच्या दरम्यान विकला गेला. पुढच्या काळात बाजारातील कमी आवकेबरोबर दरात काहीशी सुधारणा दिसू शकते, असा अंदाज कापूस बाजारातील अभ्यासकांनी व्यक्त केला.