Agrowon Podcast : लसणाचे वाढते भाव किती दिवस टिकतील?

Market Bulletin : आंतरराष्ट्रीय बाजारात सोयाबीन आणि सोयापेंडच्या भावाताली नरमाई कायम आहे. ब्राझीलमध्ये पावसाचा अंदाज आहे. पाऊस झाल्यानंतर ब्राझीलच्या सोयाबीन उत्पादनात वाढ होऊ शकते, असा अंदाज गृहीत धरून बाजारात नफावसुली सुरु आहे. त्यामुळे विक्री वाढली. याचा दबाव बाजारावर येत आहे.

तर देशातील बाजारात सोयाबीनची आवक कायम आहे. सोयाबीनची आवक दीड लाख क्विंटलच्या दरम्यान दिसते. त्यामुळे बाजारात सोयाबीनचा भाव ४ हजार ४०० ते ४ हजार ७०० रुपयांच्या दरम्यान भाव मिळत आहे. सोयाबीन बाजारातील ही स्थिती आणखी काही दिवस कायम राहू शकते, असा अंदाज सोयाबीन बाजारातील अभ्यासकांनी व्यक्त केला.

देशातील बाजारात कापसाचे भाव दाबवातच आहेत. बाजारातील आवक आजही कायम आहे. त्यामुळे भावही कमी आहेत. आजही कापसाची भवपातळी सरासरी ६ हजार ६०० ते ७ हजार २०० रुपयांच्या दरम्यान होते.

कापसाचे भाव हंगामाच्या सुरुवातीपासून दाबावातच आहेत. हंगाम सुरू होऊन ४ महिने होत आले तरी भाव कमीच असल्याने शेतकरी कापसाची विक्री करत आहेत. यामुळे भवावरील दबाव कायम दिसतो. बाजारातील ही स्थिती आणखी काही दिवस कायम राहू शकते, असा अंदाज कापूस बाजारातील अभ्यासकांनी व्यक्त केला.

टोमॅटोच्या भावात आज काहीशी नरमाई दिसून आली. बाजारातील टोमॅटोची आवक मागील काही दिवसांपासून कमी जास्त होताना दिसत आहे. त्याचा परिणाम बाजारावर होत आहे. सध्या टोमॅटोला प्रतिक्विंटल सरासरी १ हजार ३०० ते १ हजार ७०० रुपयांच्या दरम्यान भाव मिळत आहेत.

मागील आठवड्याच्या तुलनेत टोमॅटोचा भाव काहीसा कमी दिसतो. टोमॅटोची आवक आणखी काही दिवस चांगली राहू शकते. बाजारातील आवक कमी झाल्यानंतर बाजारालाही आधार मिळू शकतो, असा अंदाज टोमॅटो बाजारातील व्यापारी आणि अभ्यासक व्यक्त करत आहेत.

लसूण बाजारात सध्या चांगलाच भाव खात आहे. लसणाची बाजारातील आवक खपूच कमी आहे. तर मागणी मात्र चांगली दिसते. लसणाला सध्या लग्न समारंभ आणि हाॅटेल क्षेत्रातून चांगली मागणी येत आहे. याचा आधार लसणाच्या भावाला मिळत आहे.

त्यामुळे लसणाचे भाव तेजीत आले. सध्या राज्यातील बाजारात लसूण प्रतिक्विंटल १८ हजार ते २० हजार रुपये प्रतिक्विंटलच्या दरम्यान विकला जात आहे. किरकोळ बाजारात लसणाचे भाव चांगेच वाढले आहेत. यापुढील काळातही लसणाची मागणी कायम राहून, लसणाच्या भावातील तेजीही कायम राहू शकते, असा अंदाज आहे.

देशातील बाजारात तुरीच्या भावातील तेजी कायम आहे. तुरीच्या भावात मागील काही दिवसांमध्ये पुन्हा काहीशी सुधारणा दिसून आली. बाजारातील आवक मर्यादीत असल्याने भावाला आधार मिळत आहे. एरवी ऐन आवकेच्या हंगामात तुरीच्या भावावर दबाव आलेला असतो.

पण यंदा बाजारातील कमी आवक आणि सरकारी खरेदीचाही तूर बाजाराला आधार मिळत आहे. त्यामुळे तुरीचे भाव सरासरी ८ हजार ते ९ हजार रुपयांच्या दरम्यान आहेत. तुरीच्या भावातील तेजी पुढील काळातही कायम राहू शकते, असा अंदाज आहे.