Agrowon Podcast: हरभरा दरात चढ-उतार; वांगीला मागणी, पेरू तेजीत, हळद स्थिर, कापसाला उठाव

Market Bulletin:

हरभरा भावात चढ उतार

हरभऱ्याचा भाव मागील काही आठवड्यांपासून दरात काहीसे चढ उतार सुरु आहे. देशात पुरेसा साठा असल्याने दरावर दबाव आहे. सरकारने हरभरा आयातीवर केवळ १० टक्के शुल्क लागू केले. तसेच पिवळा वाटाणा आयात मुक्त आहे. याचा दबाव दरावर येत आहे. सध्या बाजारात हरभरा ५ हजार २०० ते ५ हजार ५०० रुपयांच्या दरम्यान विकला जात आहे. हरभऱ्याला पुढे सध्या उठाव कमी असल्याचे व्यापारी सांगत आहेत. तसेच आयातही सुरु आहे. पण सणांची मागणी आल्यानंतर दरात काहीशी सुधारणा होऊ शकते. मात्र फार मोठ्या तेजीची शक्यता कमीच आहे, असा हरभरा बाजारातील अभ्यासकांनी सांगितले. 

वांगीला मागणी

बाजारातील वांगीची मागणी टिकून आहे. मात्र वांगीच्या आवकेत चढ उतार दिसत आहेत. त्यामुळे दरही टिकून आहेत. मागील काही दिवसांमध्ये वांगी पिकाला पावसाचा फटका बसला. तसेच सततचा पाऊस आणि ढगाळ वातावरणामुळे कीड रोगाचाही प्रादुर्भाव आला होता. त्यामुळे आवक मर्यादीत आहे. सध्या वांगी २ हजार २ हजार ५०० रुपयाने विकली जात आहे. पुढील काही आठवडे वांगीची आवक मर्यादीतच राहण्याची शक्यता आहे. त्यामुळे बाजारभाव काहीसे स्थिर दिसू शकतात, असा अंदाज भाजीपाला बाजारातील व्यापाऱ्यांनी व्यक्त केला. 

पेरू तेजीत

बाजारातील पेरुची आवक मागील ३ आठवड्यांपासून मर्यादीत दिसत आहे. पावसामुळे पेरुला उठावही कमी आहे. मात्र आवक नगण्य पातळीवर होत असल्याने पेरूचे भाव तेजीत आहेत. पावसामुळे पेरु पिकाला राज्यातील बहुतांशी भागात फटका बसला. त्यामुळे माल कमी निघत आहे, असे शेतकऱ्यांनी सांगितले. सध्या पेरू ३ हजार ते ४ हजार रुपये प्रतिक्विंटलने विकला जात आहे. पेरुची बाजारातील आवक आणखी आठवडे कमीच राहणार आहे. दुसरीकडे पावसामुळे मागणीही मर्यादीतच राहण्याची शक्यता आहे. त्यामुळे दरात फार मोठ्या चढ उताराची शक्यता कमीच असल्याचे व्यापाऱ्यांनी सांगितले.

हळदीची मागणी स्थिर

हळदीचे भाव मागील २ आठवड्यांपासून स्थिरावले आहेत. पावसामुळे लग्न सराईतून येणारी मागणी काहीशी कमी झाली आहे. तसेच आंतरराष्ट्रीय बाजारात निर्माण झालेल्या अनिश्चित परिस्थितीमुळे निर्यातीवरही परिणाम होत आहे. याचा परिणाम दरावरही दिसत आहे. हळदीचे भाव मागील महीनाभरात क्विंटलमागे ५०० ते एक हजार रुपयाने कमी झाले आहेत. सध्या हळद ११ हजार ते १२ हजाराने विकली जात आहे. हळदीची मागणी पुढील काही आठवडे वाढण्याची शक्यता दिसत नाही. सणांची मागणी आल्यानंतर ऑगस्टपासून मागणी आणि दरातही सुधारणा होऊ शकते, असा अंदाज अभ्यासकांनी व्यक्त केला. 

कापसाला उठाव

आंतरराष्ट्रीय बाजारात कच्च्या तेलाच्या किमती वाढल्यानंतर मागील ३ दिवसांमध्ये कापसाच्या दरातही काहीशी सुधारणा पाहायला मिळाली. कच्च्या तेलाचे भाव वाढल्यानंतर पाॅलिस्टरचेही भाव वाढले. परिणामी कापसापासून निर्मित कापडाचेही भाव वाढले. आंतरराष्ट्रीय बाजारात आज कापसाचे वायदे ६७ सेंट प्रतिपाऊंडच्या दरम्यान होते. तर देशात कापूस ७ हजार २०० ते ७ हजार ५०० रुपयांच्या दरम्यान विकला जात आहे. बाजारातील कापसाची आवकही कमी झाली आहे. तर सीसीआयची विक्री सुरळीत सुरु आहे. कापसाच्या भावात पुढील काळातही चढ उतार राहू शकतात, असा अंदाज कापूस बाजारातील अभ्यासकांनी व्यक्त केला.