
Kolhapur News: यंदाच्या गूळ हंगामाच्या शेवटी शेवटी गुळाला चांगला दर मिळत असल्याचे चित्र गूळ बाजारात आहे. गेल्या पंधरा दिवसांपासून येथील बाजार समितीचा गूळ बाजार तेजीच्या दरात स्थिर आहे. गुळाचा दर ४२०० ते ४५०० रुपये प्रतिक्विंटल इतका आहे.
सध्या बाजार समितीत दररोज सात ते आठ हजार गूळ रव्यांची आवक होत आहे. अंतिम टप्प्यात आवक थोडी कमी असली तरी दर मात्र चांगला मिळत असल्याने गूळ उत्पादकात समाधान आहे. यंदा गेल्या वर्षीच्या तुलनेत गुळाचे दर चांगले आहेत. ऊस उत्पादन घटत असल्याने यंदा गुळाचे उत्पादनही फारसे झाले नाही.
गेल्या काही महिन्यांपासून गुजरातमधील व्यापाऱ्यांनी शीतगृहात गूळ साठवणे कमी केले. भर हंगामामध्येही व्यापाऱ्यांनी शीत गृहासाठी गुळाची खरेदी केली नाही. गेल्या दोन वर्षांमध्ये कोल्हापूरसह कर्नाटकातूनही वर्षभर गूळ मिळत असल्याने यंदा व्यापाऱ्यांनी साठवणुकीच्या गुळाला पसंती दिली नाही.
यामुळे गुजरातमधील शीतगृहे गुळाने भरलेली नाहीत. सध्या जो गूळ उत्पादित होईल त्या सर्व गुळाची विक्री होत आहे. गुजरातमध्ये शिल्लक गूळ नसल्याने व्यापारीही दररोजच्या विक्रीसाठीही ताजा गूळच खरेदी करत आहेत. रोज चांगली खरेदी होत असल्याने गुळाचे दरही गेल्या पंधरा दिवसांपासून सातत्याने चार हजार दोनशे रुपयांवर आहेत.
कोल्हापूर बाजार समितीतील गुळाचे सोमवारचे (ता. २४) दर प्रति क्विंटल, प्रति रुपयांत
प्रत किमान-कमाल सरासरी
१ ४८००-४८०० ४८००
२ ४३००- ४५०० ४४००
३ ४०००-४२९० ४२००
४ ३९००-३९९० ३९५०
कर्नाटकमधील गुऱ्हाळांना ऊस टंचाईचा फटका
गुजरातमधील व्यापारी कोल्हापूरचा गूळ कमी पडल्यास कर्नाटकमधील गूळ खरेदी करतात. यंदा कर्नाटकच्या गूळ हंगामावर ही ऊस टंचाईचा विपरीत परिणाम झाला. देशात कर्नाटकचा ऊस हंगाम लवकर समाप्त झाला. कर्नाटकातील साखर कारखान्यांना उसाची टंचाई यंदा भासली अशीच परिस्थिती गुऱ्हाळघरांची राहिली.
कर्नाटकातील गुराळगृहांमध्ये एप्रिल मे जून मध्येही गुळाचे उत्पादन सातत्याने सुरू असते. यंदा मात्र उसाची टंचाई असल्याने गुळाचे उत्पादन निम्म्यावर आले आहे, परिणामी गुजरातेतील व्यापाऱ्यांनाही कर्नाटकचा गूळ कमी पडत आहे. याचा अनुकूल परिणाम कोल्हापूर बाजार समितीतील गुळाच्या मागणीवर होत असल्याने दरात तेजी असल्याची माहिती व्यापारी सूत्रांनी दिली.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.