Kolhapur News : देशात गेल्या वर्षीपेक्षा यंदाची ऊस लागवड किंचित जास्त आहे. गेल्या वर्षीपेक्षा महाराष्ट्र व कर्नाटकात उसाची लागवड वाढली असून उत्तर प्रदेशात मात्र घटली आहे. अनुकूल मॉन्सूनमुळे उसाचे अधिक चांगले उत्पादन आणि लागवडीखालील क्षेत्रात झालेली किरकोळ वाढ, यामुळे साखर उत्पादनात वाढ अपेक्षित आहे.
उपग्रह प्रतिमांच्या आधारे आलेल्या अहवालानुसार, इंडियन शुगर अँड बायो-एनर्जी मॅन्युफॅक्चरर्स असोसिएशन (इस्मा) ने २०२५-२६ हंगामासाठी साखर उत्पादनाचा पहिला अंदाज जाहीर केला आहे. ‘इस्मा’च्या अंदाजानुसार यंदाचे (२०२५-२६) साखर उत्पादन गेल्या हंगामापेक्षा (२०२४-२५) अठरा टक्क्यांनी वाढणार आहे.
यंदा ३४९ लाख टनांपर्यंत साखर उत्पादन जाईल, असा अंदाज व्यक्त करण्यात आला आहे. गुरुवारी (ता. ३१) देशभरातील साखर उत्पादक राज्यांच्या प्रतिनिधींच्या उपस्थितीत ही बैठक झाली. बैठकीत कारखान्याच्या प्रतिनिधींनी यंदाच्या साखर हंगामाबाबत चर्चा केली.
ऊस क्षेत्राचे फोटो, अपेक्षित उत्पादन, साखरेचे उत्पादन, पाणी उपसा टक्केवारी, मागील आणि चालू वर्षातील पावसाचा परिणाम, जलाशयांमध्ये पाण्याची उपलब्धता, अपेक्षित पाऊस आणि इतर संबंधित बाबींवर सविस्तर चर्चा करण्यात आली. महाराष्ट्रात २०२५-२६ हंगामासाठी ऊस क्षेत्र १४.९३ लाख हेक्टरपर्यंत वाढले आहे, जे गेल्या वर्षी १३.८२ लाख हेक्टर होते. गेल्या वर्षीच्या तुलनेत अंदाजे ८ टक्क्यांनी क्षेत्र वाढले आहे.
गेल्या काही महिन्यांमध्ये राज्यातील ऊस उत्पादक राज्यात समाधानकारक स्थिती असल्याने यंदा उसाची वाढ चांगली असल्याचा ‘इस्मा’चा अंदाज आहे. गतवर्षीच्या तुलनेत पाण्याची उपलब्धता तीस ते चाळीस टक्क्यांनी अधिक आहे. यामुळे राज्यातील साखर उत्पादन गेल्यावर्षी ९३.३४ लाख टनांवरून १३२.६८ लाख टनांपर्यंत वाढण्याची अपेक्षा आहे. अंदाजे ३५ ते ४० टक्क्यांपर्यंत वाढण्याची शक्यता आहे.
कर्नाटकात ऊस क्षेत्र गेल्या वर्षी ६.४ लाख हेक्टरवरून सुमारे ६ टक्क्यांनी वाढून ६.७६ लाख हेक्टरवर पोहोचले आहे. महाराष्ट्राप्रमाणेच, अनुकूल पाऊस आणि जलाशयांमध्ये पुरेशा पाण्याच्या उपलब्धतेमुळे पिकाची गुणवत्ता चांगली आहे. २०२४-२५ हंगामात उत्पादित झालेल्या ५३.६८ लाख टनांवरून २३ टक्क्यांनी वाढून ६६.१९ लाख टन होण्याची अपेक्षा आहे.
उत्तर प्रदेशात, गेल्या हंगामात उसाचे क्षेत्र सुमारे ३ टक्क्यांनी घटून २२.५७ लाख हेक्टर झाले आहे, जे गेल्या हंगामात २३.३० लाख हेक्टर होते. तथापि, उभ्या पिकाची एकूण स्थिती गेल्या वर्षीपेक्षा चांगली आहे.
विविध उपाययोजनांमुळे यंदा रेड रॉट आणि इतर रोगांचा प्रादुर्भाव कमी राहण्याची अपेक्षा आहे. परिणामी साखर उत्पादन गेल्या वर्षीच्या १००.७४ लाख टन उत्पादनाच्या तुलनेत १०२.५३ लाख टन असेल असे उत्तर प्रदेशातील साखर प्रतिनिधींचा अंदाज आहे.
उसाचे क्षेत्र गतवर्षीच्या तुलनेत (लाख हेक्टर)
राज्य २०२४-२५ २०२५-२६
उत्तर प्रदेश २३.३० २२.५७
महाराष्ट्र १३.८२ १४.९३
कर्नाटक ६.४० ६.७६
तमिळनाडू २.०७ २.०५
गुजरात २.३१ २.२२
इतर राज्ये ९.२१ ८.७१
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.