Satara News: जिल्ह्यात यावर्षी ऑक्टोबर, नोव्हेंबरमध्ये सुरू होणाऱ्या ऊस गाळप हंगामासाठी तब्बल एक लाख १४ हजार हेक्टरवर ऊस उपलब्ध आहे. त्यामुळे नोंदणी केलेला ऊस वेळेत गाळपासाठी सर्वच कारखान्यांची तारांबळ उडणार आहे. त्यामुळे तोडणी, वाहतुकीचे नियोजन करावे लागणार आहे. दरम्‍यान, हा ऊस वेळेत जावा, यासाठी शेतकऱ्यांनी एकापेक्षा जास्त कारखान्यांकडे उसाची नोंदणी केली आहे, तर गत वर्षीच्‍या तुलनेत यंदाचा हंगाम दोन महिने लांबण्‍याची शक्‍यताही कारखाना क्षेत्रातील तज्‍ज्ञांकडून व्‍यक्‍त होत आहे.
गेल्या वर्षी उपलब्ध असूनही कारखान्यांनी आपल्या क्षमता वाढविल्याने तीन महिन्यांतच हंगाम संपला होता. साधारण ९९ लाख मेट्रिक टन उसाचे गाळप झाले होते, तरीही एक कोटी क्‍विंटल साखर उत्पादन कारखान्यांना गाठता आले नाही. यावेळेस मात्र, परिस्थिती वेगळी आहे. जिल्ह्यात तब्बल एक लाख १४ हजार ०५६ हेक्टर क्षेत्रावर ऊस उपलब्ध आहे. हा ऊस ऑक्टोबर, नोव्हेंबरमध्ये गाळपास येणार आहे.
जिल्ह्याचे सरासरी उसाचे क्षेत्र ९८ हजार ४७९ हेक्टर आहे. त्या तुलनेत यावेळेस जादा ऊस उपलब्ध आहे. त्यामुळे कारखान्यांना यावेळेस गाळपाचे नियोजन करावे लागणार आहे. या हंगामात १६ ते १७ कारखान्यांची गाळपाची तयारी केली आहे. सध्‍या ऊसतोडणी यंत्रणेसाठी करार करण्‍याचे काम सुरू आहे. मागील वेळी तोडणी वाहतूक व्यवस्था विस्कळित होती, त्यामुळे अनेक शेतकऱ्यांचे ऊस उशिरा तोडले गेले.
त्याचा गाळपावर परिणाम झाला. यावर्षी शेतकऱ्यांनी आपला ऊस वेळेत जावा, यासाठी एकापेक्षा जास्त कारखान्यांकडे नोंदणी केली आहे. त्यामुळे इतक्या मोठ्या प्रमाणात असलेला कार्यक्षेत्रातील ऊस वेळेत जाण्यासाठी कारखान्यांना तोडणी वाहतूक व्यवस्थेचे नियोजन करावे लागेल. पावसाचे प्रमाण लक्षात घेता रस्त्याकडेचा ऊस हार्वेस्टरने तोडण्यावर भर द्यावा लागणार आहे. त्यामुळे यावर्षी कारखाने गाळपात कोटी टनापेक्षा जास्त साखर निर्मितीचे उद्दिष्ट गाठू शकणार आहेत.
२०२५-२६ या गळीत हंगामासाठी तालुकानिहाय ऊस उपलब्धता हेक्टरमध्ये अशी :
सातारा : २०,४५०, जावळी : १,४९६, पाटण : ६,४२५, कऱ्हाड : ३०,२०६, कोरेगाव : १५,१९६, खटाव : ८,१५८, माण : १,६३०, फलटण : २०,४९१, खंडाळा : ४,४३३, वाई : ५,१२२
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.