Kabuli Chana Market: खानदेशात मोठा काबुली हरभऱ्याची जोरदार आवक, दर ९६०० रुपये क्विंटल!

Jalgaon News: खानदेशातील बाजारांत मोठा काबुली (डॉलर) हरभऱ्याची आवक सुरू झाली आहे. आवक मागील पाच ते सहा दिवसांत वाढली असून, दर ९२०० ते ९८०० रुपये प्रति क्विंटल व सरासरी ९६०० रुपये प्रति क्विंटल, असे मिळाले आहेत. सध्या रोज ८०० ते ९०० क्विंटल एवढी मो्ठ्या काबुली हरभऱ्याची आवक खानदेशात होत आहे.

मोठा काबुली हरभरा खानदेशात डॉलर किंवा मॅक्सिकन या नावाने बाजारात ओळखला जातो. त्याचा आकार अन्य हरभऱ्यांपेक्षा मोठा व रंग फिकट पांढरा किवा बासुंदी रंगाचा असतो. त्याचे दर अन्य सर्व हरभऱ्याच्या तुलनेत अधिक असतात. मोठा काबुली हरभऱ्याची लागवड खानदेशात बागायती पट्टा किंवा तापी, अनेर, गिरणा नदीच्या क्षेत्रात अधिक असते. ही लागवड काढणी पूर्ण झालेली कांदेबाग केळी, कापसाखाली रिकामे झालेले क्षेत्र व अन्य क्षेत्रांत शेतकरी करतात.

त्यास सिंचनासाठी अन्य हरभऱ्यापेक्षा अधिकचे पाणी लागते. मोठा काबुलीची लागवड खानदेशात जळगावातील चोपडा, रावेर, यावल, जळगाव, धुळ्यातील शिरपूर, नंदुरबारमधील शहादा भागात अधिक आहे. ही लागवड यंदा खानदेशात सुमारे २२ हजार हेक्टरवर झाली होती. लागवड नोव्हेंबर व डिसेंबरमध्ये झाली. या पिकात मळणी मागील आठवड्यातच सुरू झाली असून, बाजारातील आवकही गती घेत आहे.

मोठा काबुलीसाठी खानदेशात चोपडा, शिरपूर, अमळनेर येथील बाजार प्रसिद्ध आहेत. गुजरात, मध्य प्रदेशातील खरेदीदार त्याची थेट खरेदीदेखील शिरपूर, चोपडा भागांतून करतात. त्याचे दर सुरुवातीला किंवा या महिन्याच्या मध्यात १० हजार ३०० ते १० हजार ४०० रुपये प्रति क्विंटलपर्यंत होते.

परंतु आवक वाढल्यानंतर दर कमी झाले आहेत. सध्या दर ९२०० ते ९८०० रुपये प्रति क्विंटलवर स्थिर आहेत. चोपडा व शिरपूर येथील बाजारात सर्वाधिक आवक होत आहे. चोपडा येथे सध्या रोज ४०० ते ४२५ क्विंटल एवढी आवक मोठा काबुली हरभऱ्याची होत आहे. लागलीच लिलाव व चुकारे किंवा पैसे शेतकऱ्यांना दिले जात असल्याने चोपडा व शिरपुरात शेतकरी त्याची विक्री करीत आहेत.