Banana Price: केळी दरात सुधारणा

Jalgaon News: काही दिवस दबावात असलेल्या केळीदरात मागील काही दिवसांत एक क्विंटलमागे २०० ते ३०० रुपयांची सुधारणा झाली आहे. जिल्ह्यात केळी दर १२०० ते १८०० रुपये प्रतिक्विंटल, असे आहेत. तर सरासरी दर पातळीदेखील १५०० रुपयांवर आहे.
केळी दरात मोठी घसरण मध्यंतरी झाली. किमान दर ८०० ते १००० रुपये प्रतिक्विंटल, असे खाली आले होते.

महिनाभरापूर्वी दर १३०० ते २१०० रुपये प्रतिक्विंटल, असे दर्जेदार केळीस मिळत होते. परंतु अधिकची आवक व कमी उठाव यामुळे दरात सतत घसरण झाली. दर नीचांकी म्हणजेच ८०० रुपये प्रतिक्विंटलपर्यंत खाली आले. कमी दर्जाच्या केळीचे दर ५०० रुपये प्रतिक्विंटल, असे होते. निर्यातीच्या केळीचे दरही १५०० ते १६०० रुपये प्रतिक्विंटल, असे होते.

केळी दरातील घसरणीमुळे शेतकऱ्यांनी नाराजी व्यक्त केली होती. शेतकऱ्यांची मोठी वित्तीय हानी सुरू झाली. या स्थितीत शेतकऱ्यांनी तक्रारी केल्या. परंतु रावेर, चोपडा आदी बाजार समित्या बघ्याची भूमिका घेत होत्या. मध्य प्रदेशातील बऱ्हाणपुरातही केळी दरपातळी घसरली होती. तेथे किमान ६०० व कमाल १३०० रुपये प्रतिक्विंटलचा दर केळीस मागील आठवड्यात होता.

बऱ्हाणपूरच्या बाजारात केळीची आवक वाढली होती. तेथील आवक प्रतिदिन सरासरी १३० ट्रक एवढी आवक मागील आठवड्यात होती. परंतु तेथे केळी आवकेत सध्या काहीशी घट झाली आहे. जळगाव जिल्ह्यातही केळी आवकेतील वाढ थांबली आहे. सध्या जिल्ह्यात प्रतिदिन सरासरी २८० ट्रक (एक ट्रक १६ टन क्षमता) केळीची आवक होत आहे.

खानदेशातील एकूण आवक ३५० ट्रकपेक्षा अधिक आहे. ही आवक एप्रिलच्या अखेरिस प्रतिदिन ४०० ट्रकपेक्षा अधिक होती. केळी आवकेत घट झाली आहे. दुसरीकडे बाजारात द्राक्षे, कलिंगड, खरबूज आवक घटली आहे. याचाही सकारात्मक परिणाम केळी दरवाढीसंबंधी झाला आहे.